Rom kimbi 14:11-17

¹¹Miaŋgö keuŋi mi Buŋa Kimbinöŋ kewö ohoget ahöza, “Kembu nöŋön mal köhöizali, miaŋgö dopkeu öl töhönŋi kewö jizal: Ambazip körek pakpak iŋini mönö nöŋgö jemesoholne simin köla jitŋinan Anutu ni möpöseim niŋgime.”

¹²Keu miaŋgö dop nini körekŋan mönö inanŋök inanŋök ahakmemeninaŋgö kösohotnini mi Anutugöra jim asariinga kewöt neŋgima. Mewö.

¹³Miaŋgöra mönö kude toroqeba jim bölim aŋguba keuŋini jim teköme. Urumeleŋ alaurup yeŋgö könanöŋ tötaŋgöba et eŋgubapukö yuai kun mönö kude alakŋe. Miaŋgö keuŋi mönö kapaŋ köla jiba jöhöme.

¹⁴Nene yuai kunöŋ nanŋanök aŋgöjörakŋambuk qahö akzapmö, ambazipnöŋ yuaigö mötketka aŋgöjörakŋambuk akzawi, yeŋgöröhök mi aŋgöjörakŋambuk akza. Nöŋön Kembu Jisösbuk kinda keu mi möta miaŋgöra uruyahöt kun qahö akzal.

¹⁵Anutunöŋ nene pakpak amöt qem teköi sarakŋi akzemö, töndup alaurup tosatŋan dönqizizinŋini aka sömbup qahö nemakze. Kraistnöŋ yeŋgöra aka kömuiga tosatŋi eŋön mönö wuanöŋgöra sömbup nemba mewö miaŋön yeŋgö uruŋini mem bölimakze? Mewö nanŋini imbi-imbi aketka urumeleŋ alaurupŋinan miaŋgöra wösöbirik ahakzei, mewö mönö urukalemgö könaŋi mi qahö toroqeba wuataŋgömakze.

¹⁶Mötmöt ölöpŋi ahöm eŋgizapmö, miaŋgö qakŋe ahak-memeŋinan laŋ aketka tosatŋan miaŋgöra sirongen keu jiba jim eŋgimakze. Mewö asuhubapuköra galöm mem aŋguba malme.

¹⁷Wani neneya nembini aka wani oya nembini, miaŋön Anutu bemtohoŋaŋgö aiwesökŋi qahö akza. Yuai miaŋön mönö eretŋi akza. Yaŋgö bemtohoŋ uruŋe malmalgö ölŋi mi kewö: Uŋa Töröŋan inahöm neŋgiiga ahakmeme diŋdiŋi wuataŋgöinga luai qem neŋgiiga söŋgaiba maljin. Miaŋön mönö aiwesök muŋgemŋi akza.