1Dadi haꞌi netuduk numa ita hatahori Yahudir baꞌin, baꞌi Abraham mai. Ita bisa tanori hata numa ndia mai laꞌe-neu hatahorir dadi malole ro Manetualain, nahuu ramahere neu Karistus?
2Ita bisa tanori talo ia: mete ma Abraham tao hata fo neulauk, de ana bisa malole no Manetualain, na, ana naena netehuuk fo kokolak naloloa bafan nai hatahori dae-bafok matan. Tehuu nai Manetualain matan, ana ta bisa kokolak hata-hata.
3Sama leo neni surak nai Manetualain Susura Malalaon dale nae, “No Abraham namahere neu Manetualain, huu naa de Manetualain henggenee nalan dadi neu hatahori dale ndoos fo mana malole no Ndia.”
4Hatahori mana maue-osa, simbo ndia nggadin. Nggadi naa ta doi fefee muda hiek, tehuu doik fo malanggan bae nggati hatahori naa sosota-mamanggun. Huu hatahori mana maue-osak haak naa.
5Manetualain naena haak fo nae, hatahori fo mana namahere neu Yesus Karistus, bisa malole fali no Ndia, leo mae fai bakahulun hatahori naa, tao salak ma ta hosek neu Manetualain ena. Ta hambu dedeꞌak esa boe na fo hatahori bisa taon fo ana malole no Manetualain. Hatahori muste namahere neu Yesus Karistus, dei fo Manetualain henggenee nalan dadi neu hatahori dale ndoos ma simbok kana.
6Mane Dauk oo nafada boe nae, hatahorir dalen mbena sau-sau neu Manetualain henggenee nala sara nae, sira iar, hatahori dale ndoos, leo mae ara ta tao hata-hata esa boe na. Dauk surak nae:
7“Leo mae hatahori iar lena-langga Manetualain Hohoro-lalanen ena, tehuu Ana koka heni sala-singgon nara. Huu naa de ara raua ralan seli! Hatahori fo mana tao manggarauk kara, Manetualain lilii heni sala-singgon nara ena.
8Mete ma Manetualain ta reke hatahori sala-singgon, na, hatahori naa naua tebe-tebe!”
9Dadi fama te ei duꞌa mae, kada hatahori Yahudi fo mana sunat, ndia bisa naua fo ana malole no Manetualain, hetu? Ma hatahori nusa-nusak laen fo ta mana sunat, ta bisa, hetu? Taa! Duduꞌak leo naak naa, sala! Huu naa de ai fee nesenedak neu ei mae, nahuu Abraham namahere neu Manetualain, de Manetualain henggenee nalan dadi neu hatahori dale ndoos fo mana malole no Ndia.
10Manetualain henggenee nala Abraham leo naak naa, ndia faik bee? Neu ana sunat basa ena, do neu ana bei ta sunat? Ndondoon ndia, ta neu ana sunat basa ena, tehuu neu ana bei ta sunat.
11Tebe! Neu Abraham bei ta sunat, Manetualain henggenee nalan ena, dadi neu hatahori dale ndoos fo mana malole no Manetualain. Doo-doo dei de ana sunat fo dadi tanda nae, ndia dadi neu hatahori fo mana namahere neu Manetualain. No dalak naa, Abraham nasosoi dalak soa-neu basa hatahorir fo mana ramahere reu Manetualain. Manetualain simbok basa hatahorir fo mana ramahere reu Ndia fo ara malole roon, leo mae ara sunat, do taa.
12Abraham oo nasosoi dalak fee ai hatahori Yahudir fo mana neni sunat boe. Ta huuai sunat, tehuu no ai mamahere Karistus, sama leo Abraham namahere Manetualain, neu ana bei ta sunat.
13Manetualain ndara fangga hehelu-bartaak no Abraham ma tititi-nonosin nae, doo-doo te dae-bafok ia katematuan dadi neu sira pusakan. Manetualain helu-bartaa talo naa, nahuu Abraham namahere neun. De Manetualain henggenee nalan nae, hatahori dale ndoos fo mana malole no Ndia. Tehuu Manetualain ta helu-bartaa talo naa, nahuu Abraham tao tungga Ndia Hohoro-lalanen nara.
14Mete ma hatahori fo mana tao tungga kada Manetualain Hohoro-lalanen bisa simbo nala pusaka fo Manetualain helu-bartaak naa, sosoa-ndandaan nae, nemeheherek neu Manetualain naa, hie-hie a mesan. Ma Manetualain hehelu-bartaan naa oo sosoan ta boe.
15Nai bee fo hambu Manetualain Hohoro-lalanen, na, nai naa oo hatahorir lena-langga Hohoro-lalanek naa boe. Mete ma hatahori ralena-langga Ndia Hohoro-lalanen, na, Manetualain namanasa, de Ana huku-doki sara. Mete ma ta hambu Manetualain Hohoro-lalanen, na, ta hambu hatahori fo mana lena-langga Hohoro-lalanek naa.
16Huu naa de ita muste tamahere neu Ndia. Naa, nenenin lena heni basa-basan. Manetualain hii natudu Ndia dale susuen no babalan taa soa-neu hatahori fo mana namahere neu Ndia. Mete ma ita tamahere neun sama leo Abraham, na, ita simbo tala hata fo Ana helu-bartaak, leo mae ita hatahori Yahudir fo mana ramahere ma bubuluk Ndia Hohoro-lalanen, do ta Yahudir. Dadi ita basa ngga mana mamaherek naa, sama leo Abraham tititi-nonosin.
17Nai Manetualain Susura Malalaon dale, Ana helu-bartaa neu Abraham ena nae, “Au tao o dadi muu hatahori nusak noꞌuk ka bei-baꞌin.” Abraham namahere Manetualain. Doo-doo boe ma Manetualain tao natetu Ndia hehelu-bartaan naa. Ana ndia tao nasoda falik hatahori mates. No kada Ana kokolak, de hata fo ta hambu sana, ana dadi memak leo.
18Abraham namahere neu Manetualain, ma ana nahanin taa-taa, leo mae ndia mesa kana bei ta naena anak. Huu naa de Manetualain taon dadi neu “hatahori nusak noꞌuk ka bei-baꞌin.” Naa, sama leo neni surak nai Susura Malalaok nae, “Tititi-nonosik noꞌuk ka neu ko dadi numa o mai.”
19Abraham nemeheheren tean seli neu Manetualain, leo mae ana bubuluk ndia aon lasi nggoꞌo bauk ena, teun nara natun esa ena. Ma Sara ana manan nakatema ena, ma ndia oo lasi nggoꞌo-nggoꞌok ena boe.
20Tehuu Abraham nemeheheren ta natanggenggo do, duꞌa nae, Manetualain ta bisa tao natetu Ndia hehelu-bartaan. Nemeheheren neu Manetualain boe natea neu ana nakadedemak Manetualain naden.
21Abraham namahere tebe-tebe nae, hata fo Manetualain helu-bartaa nalan ena, Ana bisa tao natetun.
22Huu naa de Manetualain henggenee nala Abraham dadi neu hatahori dale ndoos fo mana malole no Ndia.
23Tehuu Manetualain Susura Malalaon nae, Manetualain ta reke leo naak soa-neu Abraham mesa kana,
24tehuu soa-neu ita boe! Mete ma ita tamahere neun, na, Ana oo henggenee nala ita dadi teu hatahori dale ndoos fo mana malole to Ndia boe. Manetualain naa, ndia tao nasoda falik ita Lamatuan Yesus numa mamaten mai.
25Yesus mate, nahuu ita ue-tao salak. Basa boe ma Ana nasoda fali numa mamaten mai fo nasosoi dalak, mita fo ita bisa malole fali to Manetualain.
