Rom 6

1

2

3

4

5

6

7

8

9

10

11

12

13

14

15

16

¹Taha katiye ki buku sah bah? Taha kamekes karei ma lomondra ndra-in, ta Kindrei leheya tikisiy tan ili tinan le gwek ai?

²Bwe handru en! Taha badeh, buku lau ndramak, ma taha ndraruwani kandriyen ta karei ma lomondra ndra-in. Eme ma, i buku sah handru, ya taha amekes kandriyen doh ili le gwek ai?

³Sebwe aha tana aha bwe nadeh? Alomwa taha badeh, amekes taha mara-ei asahan ari buruwen hawe Krais Jises, ma hawe alomwa taha a bolo imek tan.

⁴Handru, na alomwa taha badeh, taha a bolo imek ta Krais, eme ya, Kindrei ihi taha ala hawen i san ta alomwa taha a bolo imek tan. Eme ya, i buku none Krais mene amak eme loken ta imek tan i san ta boto-on ta taman, ma eme taha ale winiyan manyah ado bolo manyah ha-un.

⁵Ya, i buku none taha mene ndrahas ndra ari buruwen ndrala bolo imek hawen, idah kameh, taha ahas ari buruwen hawen ale, ma taha winiyan amak ame loken i buku iy.

⁶Sahou doh handru, tasah taha ndratanan ta kandriyen ndra-in ta ndrine taha malen badeh, ndratahiy i bada kei tondreh hawe Krais. Eme ya, bada taha ndra-in ta karei ma lomondra ndra-in ano, ma taha winiyan bala bonyo-ou ta karei ma lomondra ndra-in ja bwe.

⁷Tasah, are lau imek hawe Krais badeh, iy ndrano ta karei ma lomondra ndra-in, ma iri kandriyen ndra-in winiyan batondrok iy ja bwe.

⁸Ya, i buku none taha ndramak hawe Krais badeh, taha atehei budon tataha handru, ta taha kameh manyah ado hawen ale.

⁹Tasah, taha ndratanan, na len Krais amak eme loken ta imek badeh, iy winiyan bamak ja bwe; ya imek winiyan batondrok iy ja bwe.

¹⁰Iy akohok imek san rasan le doh kabwe. Ya, ta kandriyen doh, iy bokoro-ei boto-on ta karei ma lomondra ndra-in. Arile iy amak eme loken ja badeh, iy manyah udu mwasin ta atudun nyara Kindrei.

¹¹Ya eme i le buku aliy, taha ka-en hamon ta kandriyen ta Krais doh. Ya, taha kasehek nyala taha le ki buku doh: Taha mene ndramak hawe Krais, ya karei ma lomondra ndra-in winiyan batondrok taha ja bwe. Taha ndrahas hawe Krais, eme ma taha ndrakohok koha Kindrei ta udu le buku doh.

¹²Eme ya, taha samokon karei ma lomondra ndra-in satondrok bada taha. Bada taha doh kameh imek le. Kora-on kandriyen ndra-in ariu budon tataha ma aha a-en hamon le ta seken ta bada taha.

¹³Aha badeh, sadeu sese bada aha sala buku none ndron ta ndrole karei ma lomondra ndra-in. Arile aha kadeu bada aha ki mine Kindrei, i buku none oro lau mene amak, ano Kindrei mesekei oro amak ame loken ja, ma aha kadeu bada aha mari ki buku ndron ta ndrole kandriyen mwasin.

¹⁴Ya eme, karei ma lomondra ndra-in satondrok aha labai, tasah aha badeh, bado bahandra batanau malen ja bwe; aha badeh, ado bahandra tikisiy ta Kindrei labai.

¹⁵Ya taha kasehek ki buku sah bah? Taha badeh, bare bahandra batanau malen ta Moses ja bwe. Taha badeh, are bahandra tikisiy ta Kindrei labai, ma iy aloh taha lau mwasin labai ta madan. Ya, mwasin tataha ka-en hamon ta so-ok tataha le ma amekes kandriyen ndra-in? Bwe handru en!

¹⁶Aha ndratanan, buku none aha katehei aha ka bonyo-ou ta ari ndramak, ma aha kanuhun sahou tan, badeh, aha ndrasahan bonyo-ou tan kabwe. I buku aha a bonyo-ou ta karei ma lomondra ndra-in kameh, ndra-in ta aliy imek. Ya, buku none aha anuhun sahou ta Kindrei kameh, mwasin ta aliy kameh, iy aloh aha lau mwasin mara-ei ta madan.

¹⁷Arile, wurah ki ta Kindrei! Tasah, na len ndra-au aha asahan bonyo-ou ta karei ma lomondra ndra-in; arile ano ja, aha anuhun sahou handru na ndrinem mari udu bolo leheya aha akohok dah.

¹⁸Aha badeh, ndrame len ta karei ma lomondra ndra-in, ya eme aha ndrasahan bonyo-ou ta amekes le kandriyen mwasin ta udu mada Kindrei.

¹⁹Jo asehek sahou dah, i buku taha asehek kede-eh, tasah, i buku none jo kasehek ki san ta Malawin Ndrabun kameh batu aha winiyan bandrei bwe. Na len mene, aha alelei aha a bonyo-ou labai ta karei ma kandriyen ndra-in ta bada aha. Ya i le buku aliy, na dah aha alelei aha mara-ei ka bonyo-ou ta kandriyen mwasin winiyan tiyani manyah taha udu mwasin ma ndrabun buku Kindrei.

²⁰Na len aha a bonyo-ou ta karei ma lomondra ndra-in badeh, tawi aha, ya aha basahan bonyo-ou ta amekes kandriyen mwasin bwe.

²¹Arile, na len mene doh, aha akohok saba lakou mwasin ewek taha ta kandriyen ndra-in aha mene amekes? Iri kandriyen ndra-in nane atehei le bwilima ewek taha, neh? Bundruwe lakou mari doh, imek le!

²²Arile na dah, Kindrei le ndrakunoh aha ndrame len ta karei ma lomondra ndra-in, ya na dah, aha ndrasahan bonyo-ou ta Kindrei. Ya bundruwe lakou aha akohok doh kameh winiyan tiyani ou asahan mwasin handru ala akohok koham handru udu le buku doh.

²³Tasah, sihine karei ma lomondra ndra-in badeh, imek le. Arile, Kindrei edeu ndramas laleyah i ta lau badeh, kohan ta udu le buku doh i san ta Laban Jises Krais le.