Numero 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Migkeǥiyan te Nengazen si Moises wey si Aaron te,

²“Ipekampu niw is kada tribu te Israel ziyà te zizalem te bendira te kada tribu zan. Ne ziyà ibpelastar sikan is Tulda he Edtelevukaayan te teliwazè dan.

³Is tribu ni Juda, Isacar, wey ni Zebulun diyà megkampu te zapit te edsilaan, diyà te dizalem te bendira te kada tribu zan. Iyan heini ngazan te menge pengulu zan wey kahabet te menge sakup dan: Tribu; Pengulu; Kahabet Juda; Nashon he anak ni Aminadab; 74,600 Isacar; Netanel he anak ni Zuar; 54,400 Zebulun; Eliab he anak ni Helon; 57,400

⁹Ne 186,400 langun is kehabet kayi he grupu he ebpenguluwan te tribu ni Juda. Iyan heini sikandan grupu he edhuna emun edhipanew is menge Israilihanen.

¹⁰“Is tribu ni Reuben, ni Simeon, wey ni Gad, ne ziyà megkampu te zapit te zivavà, diyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Reuben; Elizur he anak ni Shedeur; 46,500 Simeon; Shelumiel he anak ni Zurishadai; 59,300 Gad; Eliasaf he anak ni Deuel; 45,650

¹⁶Ne 151,450 langun is kahabet kayi he grupu he ebpenguluwan te tribu ni Reuben. Iyan sikandan edtinundug te grupu ni Juda emun edhipanew is menge Israilihanen.

¹⁷“Is edtinundug kandan iyan is tribu ni Levi he ed-uwit duen te Tulda he Edtelevukaayan. Is langun he tribu kinahanglan he ebpetuntunduǥà emun edhipanew sikandan, iring te kebplastar zan emun ke egkampu zan, he ziyà te dizalem te bendira he neketukid te kada tribu zan.

¹⁸“Is tribu ni Efraim, Manase, wey ni Benjamin, ne ziyà megkampu te zapit te edsenlepan, diyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Efraim; Elishama he anak ni Amiud; 40,500 Manase; Gamaliel he anak ni Pedazur; 32,200 Benjamin; Abidan he anak ni Gideoni; 35,400

²⁴Ne 108,100 langun is kahabet kayi he grupu he ebpenguluwan te tribu ni Efraim. Edtundug sikandan te tribu ni Levi emun edhipanew is menge Israilihanen.

²⁵“Is tribu ni Dan, ni Asher, wey ni Naftali ne ziyà megkampu te zapit te zizaya, ziyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Dan; Ahiezer he anak ni Amishadai; 62,700 Asher; Pagiel he anak ni Ocran; 41,500 Naftali; Ahira he anak ni Enan; 53,400

³¹Ne 157,600 langun is kahabet kayi he grupu he ebpenguluwan te tribu ni Dan. Iyan sikandan diyà te kinehuziyanan emun edhipanew is menge Israilihanen. Edhipanew zan diyà te zizalem te bendira zan he neketukid te kada tribu zan.”

³²Is kinetivuukan he kahabet te menge Israilihanen he ingkelista ziyà te kada tribu, 603,550 langun.

³³Ne wazà kayi meragkes is menge kevuwazan ni Levi, su wazà sikandan iragkes te ebilang sumalà te insuǥù te Nengazen ki Moises.

³⁴Midsunud te menge Israilihanen is langun he insuǥù te Nengazen ki Moises: is kada tribu migkampu wey midhipanew he zizalem te kada bendira te tribu zan he neketukid te kada tribu wey pemilya zan.