1Dutun he timpu, nekidsukulà ki Moises si Kora he anak ni Izhar, te anak ni Kohat te anak ni Levi. Duma zin te nekidsukulà si Datan wey si Abiram he menge anak ni Eliab, wey si On he anak ni Pelet he pudu kevuwazan ni Reuben. Duen pa zuma zan he 250 he menge Israilihanen he menge maama he nekilala wey mibpilì he menge pengulu te Israel puun te menge Israilihanen.
3Midsevaha sikandan medhendiyà te ki Moises wey ki Aaron, he ke sikandan te, “Subre en heini is ebeelan niw kenami! Maan is ibpelavew niw is keugelingen niw kayi te mahabet he menge etew te Nengazen he mibpilì man pezem te Nengazen is tivuuk he menge Israilihanen he ebpenilbi kandin ne ebpekiduma zaan sikandin kayi?”
4Kegkezineǥa ni Moises kayi, midluhud sikandin is nengemuyù diyà te Nengazen.
5Ne migkeǥiyan din si Kora wey is langun he sumusunud kandin te, “Keeselem ke meselem ibpezayag te Nengazen ke hentei is tutuu he mibpilì din he ebpenilbi kandin pinaaǥi te kegkememumuhat, su ibpeuvey zin diyà te etuvangan din is mibpilì din. Umbe iyan heini veeli niw keeselem: Kuwa kew te teleǥuey te menge veyewà,
7ne sevuki niw heini te vaǥa wey beyewà, ne uwita niw ziyà te etuvangan te Nengazen. Ne egkeehè tew ke hentei is mibpilì te Nengazen he ebpenilbi kandin. Iyan kew is menge Levihanen, mibpesubra te ebeelan niw!”
8Migkaǥi pa si Moises diyà te ki Kora te, “Pemineg kew kayi is menge Levihanen.
9Kenè pe be ereg para keniyu he ziyà te tivuuk he keet-etawan te Israel iyan kew mibpilì te Megbevayà te Israel he ebpekeuvey ziyà te etuvangan din pinaaǥi te kebpenilbi niw ziyà te Tulda zin wey kebpenilbi niw te kezekelan?
10Mibpilì kew zin he ebpenilbi kandin, ne ǥuntaan egkesuat kew pa he egkehimu he memumuhat?
11Sikew wey is menge sumusunud kenikew, nekidsukulà te Nengazen ne kenà diyà te ki Aaron.”
12Ne kegkepasad dutun, impetawag ni Moises si Datan wey si Abiram, he menge anak ni Eliab. Piru migkaǥi sikandan te, “Kenè key edhendiyan!
13Kenè pe be ereg is kegkuwaa nu kenami ziyà te Ehipto he meupiya wey uuzaran is tanà duen su wey key kenikew mehimetayi kayi te sibsivayan? Ne ǥuntaan egkesuat ke pa he edhadìhadì kenami.
14Ne liyu keniyan, wazè key kenikew dumaha ziyà te tanà he meupiya wey selebpeten wey wazè key kenikew veǥayi te menge vevesukà etawa pemuleey te paras he egkaangken dey. Ne ǥuntaan, egkesuat ke pa he edtuntu kenami? Kenè key edhendiyan te kenikew!”
15Ne utew nepauk si Moises ne ke sikandin diyà te Nengazen te, “Kenè nu zewata is menge pemuhat dan. Wazà a mekesalà diyà te minsan hentei kandan; wazà minsan sevaha he asnu he migkuwa ku ziyà te kandan.”
16Migkeǥiyan ni Moises si Kora te, “Keeselem, sikew wey is menge sumusunud nu, hendiyè kew te etuvangan te Nengazen diyà te Tulda he Edtelevukaayan, su edhendiyà daan si Aaron.
17Is kada sevaha zuen te 250 he menge sumusunud nu, ipeuwit nu te teleǥuey te veyewà ne peteǥui nu kandan te veyewà, he para te ibpemuhat diyà te Nengazen. Ne sikiyu ki Aaron, uwit kew zaan te tigselimbaha he teleǥuey te veyewà.”
18Umbe, migkuwa is kada sevaha kandan te keugelingen din he teleǥuey ne midteǥuan din haazà te veyewà wey vaǥa, ne midhitindeg sikandan duma ki Moises wey ki Aaron diyà te gemawan te Tulda he Edtelevukaayan.
19Ne hein netiǥum en ni Kora is menge sumusunud kandin diyà te etuvangan ni Moises wey ni Aaron, diyà te ǥemawan te Tulda he Edtelevukaayan, mibpeehè en te langun he etew zutun is mekeǥeǥehem he kebpekiduma te Nengazen kandan.
20Migkeǥiyan te Nengazen si Moises wey si Aaron,
21“Pekeziyù kew kayi te menge etew su ebpenhimetayan ku sikandan guntaan.”
22Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”
23Migkaǥi is Nengazen diyà te ki Moises te,
24“Keǥiyi nu is menge etew he mebpekeziyù dan diyà te menge tulda keniyan te tetelu he si Kora, si Datan, wey si Abiram.”
25Ne mibeyaan ni Moises si Datan wey si Abiram, ne midtinundug kandin is menge perezumala te Israel.
26Ne migkeǥiyan din is menge etew te, “Pekeziyù kew ziyà te menge tulda keniyan te lalung he menge etew! Kenè kew ǥawed te minsan hengkey he ǥaked dan, su emun ebeelan niw heini ne edèdeetan kew tenged te langun he menge salè dan.”
27Umbe, mibpekeziyù is menge etew puun dutun te menge tulda ni Kora, ni Datan, wey ni Abiram. Ne migawas si Datan wey si Abiram ne midhitindeg dan diyà te ǥemawan te menge tulda zan duma te menge esawa zan wey menge anak dan.
28Migkeǥiyan ni Moises is menge etew te, “Pinaaǥi kayi egketuenan niw he iyan midsuǥù kedì is Nengazen te kebaal kayi he menge vaal, ne kenà kediey zà he suat!
29Emun netural he kemetayen is ibpatey kayi he menge etew, ne wazè e ves suǥua te Nengazen.
30Iyan, emun edhimu is Nengazen te egkein-inuwan, ne ebeka is tanà he ed-eveleng kandan he uuyag duma te langun he menge azen dan pehendiyà te kelibutan te menge minatey, ne egketuenan niw he heini he menge etew inselikwey zan is Nengazen.”
31Ne hein nekepasad si Moises he egkaǥi, mibeka is tanà he nehitindeǥan ni Datan wey ni Abiram.
32Ne mid-eveleng sikandan duma is pemilya zan te tanà, duma is langun he menge sumusunud ki Kora wey is langun he azen dan.
33Uuyag sikandan is langun he mid-eveleng te tanà duma is langun he azen dan. Nekedlikuey is tanà ne nahanew sikandan puun te kezekelan.
34Is langun he menge Israilihanen he nekeliǥuy kandan mibpekeziyù hein nezineg dan is kulehian duen te menge etew, su neisip dan he kela ke elin sikandan evelenga te tanà.
35Ne mibpengelinteuwan te Nengazen he medtuvù is hapuy ne neepur sikan is 250 he menge sumusunud ni Kora he nemuhat te veyewà.
36Migkeǥiyan te Nengazen si Moises te,
37“Keǥiyi nu si Eleazar he memumuhat, he anak ni Aaron, he kuwaa zin sikan is menge teleǥuey te veyewà duen te nemematey te kegketutung, su segradu heini he menge teleǥuey. Keǥiyi nu zaan sikandin he ipeyapat din diyà te meziyù sikan is menge vaǥa
38zuen te menge teleǥuey he ebpuun duen te menge etew he nemematey tenged te menge salè dan. Ne ipelumpipì nu kandin sikan is menge teleǥuey ne ipekaple din haazà duen te pemuhatà su inhalad heini kayi te kediey ne nehimu heini he segradu. Ne heini he pekaplà duen te pemuhatà ne egkehimu he petizaan te menge Israilihanen.”
39Ne tenged dutun te insuǥù te Nengazen pinaaǥi ki Moises, mibpenguwa ni Eleazar he memumuhat sikan is brunsi he menge teleǥuey te veyewà he uwiten duen te nengevinsulan, ne midlumpipì din heini su ibpekaple din duen te pemuhatà. Ne sevaha heini he petizaan te menge Israilihanen, he wazà minsan sevaha kandan he midtuǥutan te ked-uvey ziyà te pemuhatà te kedtutung te veyewà para te Nengazen gawas te menge kevuwazan ni Aaron, ne emun ebeelan dan heini egkeiring dan ki Kora wey te menge sumusunud kandin.
41Ne sunud he andew, midriklamu en maan is tivuuk he keet-etawan te Israel ziyà te ki Moises wey ki Aaron. Ke sikandan te, “Mibpenhimetayan niw is menge etew te Nengazen.”
42Dutun te kedtiǥum dan su ibpetuenan dan ki Moises wey ki Aaron is menge riklamu zan, midsinaru zan diyà te Tulda he Edtelevukaayan ne neehè dan he netembunan heini te ǥapun ne impaahà te Nengazen is mekeǥeǥehem he kebpekiduma zin.
43Ne midhendiyà si Moises wey si Aaron te egkesineruwan duen te Tulda.
44Ne migkaǥi is Nengazen diyà te ki Moises te,
45“Pekeziyù kew keniyan te menge etew su segugunè ku sikandan edèdeeti.” Ne midluhud sikandan is dezuwa.
46Ne migkeǥiyan ni Moises si Aaron te, “Kuwaa nu is teleǥuey nu te veyewà ne teǥui nu te veyewà wey vaǥa he ebpuun diyà te pemuhatà. Ne gaanggaan ka hendiyà te menge etew ne veeli nu is tulumanen su wey zan mevelukasi te menge salè dan, su nepauk en is Nengazen ne ebpuun en is limas.”
47Ne midtuman ni Aaron haazà is insuǥù ni Moises, ne mibpelelaǥuy sikandin pehendiyà te teliwazà te menge etew. Mibpuun en is kedlimasa zutun te menge etew, piru impemuhat gihapun ni Aaron sikan is beyewà su wey mevelukasi haazà is menge etew tenged te menge salè dan.
48Midhitindeg sikandin diyà te pid-elangan te nemematey wey menge uuyag ne neengked is kebpematey zan.
49Piru 14,700 is nemematey tenged dutun he kezeetan kenà ragkes is nemematey tenged ki Kora.
50Ne midlikù si Aaron diyà te ki Moises duen te ǥemawan te Tulda he Edtelevukaayan su neengked en sikan is kezeetan.
