1मिनु परमप्रभु यावेमी मोसा नु हारून आस कली
2“इस्राएलीपुकीम आन थर ङा छेदर बाक्तीकेम आन ताम्बु कीचा माल्नीम। मेकोपुकी ग्रुम्तीक ताम्बु क्येङा ङोन एर ओंथ बाक्चा माल्नीम।
3पूर्ब, नां दाप्तीक गे यहूदा आ हुल आन बाक्तीके बाक्ब। मेको आन छेदर आ नेक्था आन ताम्बु कीचा माल्नीम। यहूदा आ थर ङा मुर आन ठेयब मुर अम्मीनादाब आ तौ नहशोन बाक्त।
4मेको आन कली खुप्शा हिक्शोनु ७४ हजार ६ सहे लडाइ पाइब वोंइश मुर बाक्नीम।
5मेको आन नेक्था इस्साकार आ हुल आन बाक्तीके बाक्ब। इस्साकार आ थर ङा मुर आन ठेयब मुर सुआर आ तौ नेथनेल बाक्ब।
6मेको आन कली खुप्शा हिक्शोनु ५४ हजार लडाइ पाइब वोंइश मुर बाक्नीम।
7मिनु नोले जबूलून आ थर ङा मुर आन बाक्तीके बाक्ब। जबूलून आ थर ङा मुर आन ठेयब मुर हेलोन आ तौ एलीआब बाक्ब।
8मेको आन कली खुप्शा हिक्शोनु ५७ हजार ४ सहे लडाइ पाइब वोंइश मुर बाक्नीम।
9यहूदा आ नेक्था खुप्शा हिक्शो मुर आन हुल नेल्ल पा लाख का ८६ हजार ४ सहे लडाइ पाइब वोंइश मुर बाक्नीम। मेको नेल्ल मुर आन ङोंइती गाक्चा माल्नीम।
10मिनु दक्खिन गे रूबेन आ हुल आन बाक्तीके बाक्ब। मेको आन छेदर आ नेक्था आन ताम्बु कीचा माल्नीम। रूबेन आ थर ङा मुर आन ठेयब मुर शेदेउर आ तौ एली-सुर बाक्ब।
11मेको आन कली खुप्शा हिक्शोनु ४६ हजार ५ सहे लडाइ पाइब वोंइश मुर बाक्नीम।
12मेको आन नेक्था सिमियोन आ हुल आन बाक्तीके बाक्ब। सिमियोन आ थर ङा मुर आन ठेयब मुर सुरी-शदै आ तौ शेलुमीएल बाक्ब।
13मेको आन कली खुप्शा हिक्शोनु ५९ हजार सहे सां लडाइ पाइब वोंइश मुर बाक्नीम।
14मिनु नोले गाद आ थर ङा मुर आन बाक्तीके बाक्ब। गाद आ थर ङा मुर आन ठेयब मुर रूएल आ तौ एली-आसाफ बाक्ब।
15मेको आन कली खुप्शा हिक्शोनु ४५ हजार ६ सहे ५० जना लडाइ पाइब वोंइश मुर बाक्नीम।
16रूबेन आ नेक्था खुप्शा हिक्शो मुर आन हुल नेल्ल पा लाख का ५२ हजार ४ सहे ५० जना लडाइ पाइब वोंइश मुर बाक्नीम। मेकोपुकी यहूदा आ हुल आन नोले गाक्चा माल्नीम।
17मिनु ग्रुम्तीक ताम्बु नु लेवी आन बाक्तीक ताम्बु कुरशा गाक्चा माल्नीम। दोदेंशो पा आन ताम्बु कीशो बाक्मे, मोदेंशो पा आन छेदर आ नेक्था गाक्चा माल्नीम। गन्ती १०:१७,२१
18पच्छिम गे एफ्राइम आ हुल आन बाक्तीके बाक्ब। मेको आन छेदर आ नेक्था आन ताम्बु कीचा माल्नीम। एफ्राइम आ थर ङा मुर आन ठेयब मुर अम्मीहुद आ तौ एली-शामा बाक्ब।
19मेको आन कली खुप्शा हिक्शोनु ४० हजार ५ सहे लडाइ पाइब वोंइश मुर बाक्नीम।
20मेको आन नेक्था मनस्से आ हुल आन बाक्तीके बाक्ब। मनस्से आ थर ङा मुर आन ठेयब मुर पेदा-सुर आ तौ गमालीएल बाक्ब।
21मेको आन कली खुप्शा हिक्शोनु ३२ हजार सहे निक्शी लडाइ पाइब वोंइश मुर बाक्नीम।
22मिनु नोले बेन्यामीन आ थर ङा मुर आन बाक्तीके बाक्ब। बेन्यामीन आ थर ङा मुर आन ठेयब मुर गिदेओनी आ तौ आबी-दान बाक्ब।
23मिनु मेको आन कली खुप्शा हिक्शोनु ३५ हजार ४ सहे लडाइ पाइब वोंइश मुर बाक्नीम।
24एफ्राइम आ नेक्था खुप्शा हिक्शो मुर आन हुल नेल्ल पा लाख का ८ हजार सहे का लडाइ पाइब वोंइश मुर बाक्नीम। मेकोपुकी लेवी आन नोले गाक्चा माल्नीम।
25उत्तर गे दान आ हुल आन बाक्तीके बाक्ब। मेको आन छेदर आ नेक्था आन ताम्बु कीचा माल्नीम। दान आ थर ङा मुर आन ठेयब मुर अम्मी-शदै आ तौ अही-एजेर बाक्ब।
26मेको आन कली खुप्शा हिक्शोनु ६३ हजार ७ सहे लडाइ पाइब वोंइश मुर बाक्नीम।
27मेको आन नेक्था आशेर आ हुल आन बाक्तीके बाक्ब। आशेर आ थर ङा मुर आन ठेयब मुर ओक्रान आ तौ पगीएल बाक्ब।
28मेको आन कली खुप्शा हिक्शोनु ४१ हजार ५ सहे लडाइ पाइब वोंइश मुर बाक्नीम।
29मिनु नोले नाप्ताली आ थर ङा मुर आन बाक्तीके बाक्ब। नाप्ताली आ थर ङा मुर आन ठेयब मुर एनान आ तौ अहीरा बाक्ब।
30मेको आन कली खुप्शा हिक्शोनु ५३ हजार ४ सहे लडाइ पाइब वोंइश मुर बाक्नीम।
31दान आ नेक्था खुप्शा हिक्शो मुर आन हुल नेल्ल पा लाख का ५७ हजार ६ सहे लडाइ पाइब वोंइश मुर बाक्नीम। मेकोपुकी मुर नेल्ल आन क्येङा नोले गाक्चा माल्नीम।
32एको इस्राएली आन थर थर ङा लडाइ पने चाप्ब खुप्शा हिक्शो मुर बाक्नीम। आन हुल हुल ङा मुर नेल्ल पा ६ लाख हजार सां ५ सहे ५० जना लडाइ पाइब वोंइश मुर बाक्नीम” देंत गन्ती १:४६
33मिनु परमप्रभु यावेमी मोसा कली अरेशो खोदेंशो पा लेवी आ थर ङा मुर अरु इस्राएलीपुकी खोदेंशो पा मखुप्शो महिक्शो बाक्तेक्म। गन्ती १:४८-४९
34इस्राएलीपुकीमी परमप्रभु यावेमी मोसा कली अरेशो खोदेंशो पा पाम्तेक्म। आन थर ङा बाक्तीकेमी आन छेदर आ नेक्था बाक्शा, आन थर थर पा गाक्तेक्म।
