Israel Hanigo Namba 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Godigo Moses de Aron sibolo te tama po wali,

²“Te Israel dabe augwaligo gesi noma pesage nigigi pabo sogo da, te deli deli bidi aga ugwa be te aga hani mugo plak ugwa walalubo pagede mu sę emainao. Augwaligo name ugwa be eno name ugwa lotu be bagulama sese pomainao. Tiali goli, augwaligo eno name ugwa be pąde mu sę emainu elamuo. Menio. Augwaligo be digibulu ganama sę emainao.”

³“Te giliga asobo badu bidi hani sela te Juda wąį hanigo plak pąde sisinalubo madi dao. Augwaligo te augwa hani tobolu bidi dologode naga bidiyu ebo dao. Te Juda wąį hanigo tobolu bidi te Aminadapgo ogwa Nason dao. Te Juda hani bidi da, te 74,600 bidi dabe tama bidibao. Te Isakar hani bidi dabego tobolu bidi da, te Suargo ogwa Netanel dao. Te Isakar hani bidi te 54,400 bidi tama bidibao, tama augwali te Juda hani bogo badu bidaibao. Te Sebulun hani tobolu bidi da, te Helongo ogwa Eliap dao. Te Sebulun hani bidi te 57,400 bidi tama bidibao, tama augwali te Isakar hani pąde bidaibao. Te bidi hani sela tama namba te 186,400 bidi tama elalubao. Tama te gasaba pabo sogo te hani sela bolo polasa pomainao,” wali.

¹⁰“Te Godigo ugwa lotu be saut badu te bidi hani sela te Ruben hanigo plak pagede sisinalubo dao. Augwali te augwa hanigo tobolu bidi dologode naga bidimainao. Te Ruben hanigo tobolu bidi te Sedeurgo ogwa Elisur dao. Te Ruben hanigo te 46,500 bidi tama elalubao. Te Simeon hanigo tobolu bidi da, te Surisadaigo ogwa Selumiel dao. Te Simeon hani bidi da, te 59,300 bidi tama bidibao. Tama augwali te Ruben hani bogo badu bidaibao. Te Gat hanigo tobolu bidi da, te Ruelgo ogwa Eliasap dao. Te Gat hani bidi da, te 45,650 bidi tama bidibao. Tama augwali te Simeon hani bogo badu bidaibao. Te bidi hani selago bidi dabe namba deliba sisinama, te 151,450 bidi tama bidali. Te gasaba pabo sogo da, te hani sela te polasa pabo hani wali tama pomainao.”

¹⁷“Augwali te pesage nigilama bidali taga peyu, gasaba pabo sogo da, te Juda hani wąį dabe bolo polasa te gasa hani tudiba ilama, augwali bolo polasa pomainao, te gasa hani dabego te augwa dolo nogo badu bidibo bage augwa plak ugwa dali polasa yai digi, te meba hani nosali tama peyu emainao. Tama te Livai hani dabego te Godigo ugwa be, me te ugwa be tomode munalubo nai dabe, augwaligo selasa peyu, augwali te gasa hani dabe tomode mu elama tama peyu emainao. Te a naga olama, me badu nogo deli bidi hani polasa peyu, tama te Livai hani tomode elalu, me a naga olama, me badu nogo deli bidi hani nosali elama, tama pomainao.”

¹⁸“Te giliga dega sabo badu te bidi hani sela te Efraim wąį hanigo plak pąde sisinalubo, tama te bage augwali te augwa hani tobolu bidi dologode naga bidimainao. Te Efraim hanigo tobolu bidi te Amihutgo ogwa Elisama dao. Te Efraim hani bidi te 40,500 bidi tama bidibao. Te Manase hanigo tobolu bidi te Pedasurgo ogwa Gamaliel dao. Te Manase hani bidi te 32,200 bidi dabe tama bidibao. Tama augwali te Efraim hani bogo badude bidaibao. Te Benjamin hanigo tobolu bidi da, te Gideongo ogwa Abidan dao. Te Benjamin hani bidi te 35,400 bidi dabe tama bidibao. Tama augwali te Manase hani bogo badude bidaibao. Te bidi hani selago nedali bidi namba deliba taluyu, te 108,100 bidi dabe tama elalubao. Tama te gasaba pabo sogo da, te bidi hani sela te Livai dabe wali nosali tama peyu yao.”

²⁵“Te not badu te bidi hani dabe te Dan hanigo plak pąba sisinama bidibo dao, te augwali te augwa tobolu bidi dologode bidalumainao. Te Dan hanigo tobolu bidi te Amisadaigo ogwa Ahieser dao. Te Dan hani bidi te 62,700 bidi dabe tama bidibao. Te Aser hanigo tobolu bidi te Okrango ogwa Pagiel dao. Tama te Aser hani bidi te 41,500 bidi dabe tama bidibao. Tama augwali te Dan hani bogo badude bidaibao. Te Naptali hanigo tobolu bidi te Enango ogwa Ahira dao. Tama te Naptali hani bidi te 53,400 bidi dabe tama bidibao. Tama augwali te Aser hani bogo badude bidaibao. Tama te bidi hani selago nedali bidi dabe te taluyu, te 157,600 bidi dabe tama elalubao. Tama te gasaba pabo sogo, te hani sela augwali te nosali mu elama peyu emainao.” Godigo te po wai dao.

³²Te tigidali Israel dabe namba sese deliba taluyu, te 603,550 bidi dabe tama elaluali.

³³Tiali goli, augwaligo te Genuai Bidigo po wali peyu, augwaligo te Livai hani te gasa Israel dabe dali me nedebeo. Te Livai hani bage te tedali dao.

³⁴Te tama tialima, te Israel dabe augwaligo te Genuai Bidigo te Mosesbolo augwaligo yao wali sę dabe naga wali peyu yali. Tama deli deli bidigo aga ugwa be te augwa plak pąde sę eyu ela pali. Tama augwali gasaba pabo sogo, augwaligo augwa hani dabe mu wali naga peyu yali.