Text copied!
CopyCompare
Is Lalag te Megbevayà - Numero

Numero 35

Help us?
Click on verse(s) to share them!
1Hein migkampu is menge Israilihanen diyà te kilid te Jordan he suǥud te Moab he atbang te Jerico, migkeǥiyan te Nengazen si Moises te,
2“Keǥiyi nu is menge Israilihanen he veǥayi zan is menge Levihanen te menge inged he egkeubpaan dan he ziyà te tanà he egkepengevilin dan. Ne veǥayi zan daan sikandan te menge penebtavà diyà te peliǥuy zutun he menge inged.
3Pinaaǥi kayi zuen egkeubpaan dan he menge inged wey zuen egkepepenebtavan dan te menge uyaǥen dan.
4Is menge penebtavà he ibeǥey niw kandan diyà te peliǥuy te kada inged dan, kinahanglan he zuen dan keziyù he 1,500 he ǥiek puun te verengbeng te menge inged dan.
5Ne ziyà te peliǥuy te kada inged dan sukud kew te 3,000 he ǥiek puun te inged pehendiyà te edsilaan, divavà, edsenlepan, wey zizaya, ne ziyà te teliwazà kayi is inged. Ne iyan heini penebtavà diyà te menge inged dan.
6“Beǥayi niw zaan is menge Levihanen te heenem he inged he eputà he zutun ebpelaǥuy is etew he ebpekepatey he wazè din tivevaa. Ne kenè en heini ragkes te 42 he menge inged he ibeǥey niw kandan.
7Umbe 48 langun he menge inged is iveǥey niw te menge Levihanen ragkes is menge pepenebtavè dan.
8Heini he menge inged, kevahin te menge tanà te menge tribu te Israel. Is tribu he mezakel ne zekelà is kandin he vahin, mebeǥey te mezakel he menge inged, ne is tribu he zeisey zà mebeǥey zà daan te egkepipira he inged.”
9Ne migkaǥi is Nengazen diyà te ki Moises te,
10“Keǥiyi nu is menge Israilihanen he emun ebpekelayun dan en te Jordan pehendiyà te Canaan,
11mebpilì dan te menge inged he edhimuwen he eputà he zutun ebpelaǥuy is etew he ebpekepatey he wazè din tivevaa.
12Ne egkedipinsahan sikandin dutun he menge inged wey kenà mepatey te egkesuat he ebales kandin. Kenà sikandin ereg he edhimetayan dutun te wazè pa sikandin mekeetuvang te kezekelan su wey mehukumi.
13Haazà is heenem he inged, egkehimu he menge inged niw he eputà.
14Is tetelu he inged ne ziyè niw benguna te zapit te edsilaan te Jordan ne is tetelu pa ne ziyà te Canaan.
15Heini is heenem he menge inged ne kenà iyan kew zà ebpekaaput duen is menge Israilihanen, kekena, elin is kenà menge Israilihanen he zuma niw he meǥinged para is minsan hentei kandan he ebpekepatey he wazè din tivevaa ne ebpekepelaǥuy zutun he menge inged.
16“Iyan, emun edlegkuten te sevaha he etew is duma zin he etew te putew ne ebpatey heini, ne ed-isipen he meveǥat is salà dutun he etew, ne kinahanglan he edhimetayan daan.
17Emun ebpekepatey is sevaha he etew pinaaǥi te kegamit te vatu, ne ed-isipen heini he meveǥat is salè din, ne kinahanglan he edhimetayan daan sikandin.
18Etawa edlegkuten din te kayu is sevaha he etew ne ebpatey heini, ed-isipen he meveǥat is salè din, ne kinahanglan he edhimetayan daan sikandin.

19Is megeget he kezuzumahi te nepatey iyan duen din ketenged te kedhimatey zuen te nekepatey. Himetayi zin heini emun egkeehè din.
20“Emun is sevaha he etew he edumut, ne nekepatey te etew pinaaǥi te kedsinumag etawa kedtuleng te minsan hengkey,
21etawa kedsumbag, ne ed-isipen he meveǥat is salà te mibaal kayi, ne kinahanglan he edhimetayan sikandin. Is megeget he kezuzumahi zutun te nepatey iyan duen din ketenged te kedhimatey zuen te nekepatey. Himetayi zin heini emun egkeehè din.
22“Piru penenglitan is sevaha he etew he wazè din kedumut, ebpekepatey te etew piru wazè din tivevaa he ingkesinumag din etawa netuleng din te minsan hengkey,
23etawa wazè din mevembentayi he neuluǥan din heini te vatu. Ne tenged te nepatey zin haazà is etew, minsan kenè din kuntada wey kenè din tuyù is kedhimetayi kayi,
24edumahan sikandin wey is etew he egkesuat he ebales diyà te kezekelan ne edhukuman sikandin sumalà kayi te nekaǥi en he sulunuzen:
25Emun egkesusi he tutuu iyan he wazè din tivevaa is kedhimatey, kinahanglan he edipinsahan te kezekelan haazà is etew he nekepatey, para kenà mevelesi te ebales kandin, ne idlikù sikandin diyà te inged he eputà he zutun sikandin med-aput. Ne kinahanglan he kenà sikandin ed-awà dutun taman te ebpatey is lavew he memumuhat he impehinungud para te kebpenilbi.
26“Iyan, emun egawas dutun te inged he eputà haazà is nekepatey
27ne egkaahà duen te etew he egkesuat he ebales kandin, ne egkehimu ke edhimetayan sikandin dutun te etew. Ne heini is etew he mibales wazè din televaken.
28Umbe, haazà is nekepatey kinahanglan he kenà ed-awà dutun te inged he eputà taman te ebpatey is lavew he memumuhat, ne egkehimu en human ke ed-ulì sikandin diyà te kandan.
29“Iyan heini menge sulunuzen he ereg he edtumanen niw taman te taman minsan hendei kew ed-ubpà.”
30“Is minsan hentei he edhimatey te iring din he etew, kinahanglan he edhimetayan, piru kinahanglan he zuen menge tistiǥus he ebpekepeǥumbenar he tutuu he nekepatey haazà he etew. Emun sevaha zà he tistiǥus is ebpeǥumbenar, ne kenà edhimetayan haazà is etew.
31“Kenè niw zewata is ibayad para kenà mehimetayi is meveǥat is salè din he midhukuman he edhimetayan. Kinahanglan he edhimetayan heini.
32Kenè niw zaan dewata is idlekat para te etew he mibpelaǥuy ziyà te inged he eputà su wey sikandin mekeulì diyà te kandan te kenè pa ebpatey is lavew he memumuhat.
33Ne pinaaǥi kayi kenè niw egkeremerikan is tanà he ed-ubpaan niw, su is kedhimatey ebpekeremerik te tanà. Ne iyan dà ebpekelumpiyu kayi is kemetayen gihapun.
34Umbe, kenè niw remeriki is tanà he ed-ubpaan niw. Su siak mismu is Nengazen, mibpekid-amur a keniyu te menge Israilihanen.”