1Ne hein neipus sikan is limas, migkaǥi is Nengazen diyà te ki Moises wey ki Eleazar he anak ni Aaron he memumuhat te,
2“Sinsusa niw is kada pemilya te tivuuk he keet-etawan te Israel sumalà te pemilya zan–sikan is langun he maama he 20 he tuig is penuiǥen dan pehendiyà te metikang he egkehimu he edsunderuwen te Israel.”
3Umbe, mibpekidlalag si Moises wey si Eleazar he memumuhat te menge Israilihanen diyà te suǥud te Moab he kilid te Wahig he Jordan he uvey te Jerico.
4Kesikandan diyà te kandan te, “Sinsusa niw is menge maama he 20 he tuig is penuiǥen dan pehendiyà te metikang, sumalà te insuǥù te Nengazen ki Moises.” Iyan heini menge Israilihanen he migawas puun te Ehipto:
5Is menge kevuwazan ni Reuben te kinekekayan he anak ni Jacob, iyan is pemilya ni Hanoc, Palu,
6Hezron, wey Carmi.
7Iyan sikandan menge pemilya he ebpuun diyà te ki Reuben; 43,700 sikandan is langun.
8Is anak ni Palu iyan si Eliab,
9ne is menge anak ni Eliab iyan ensi Nemuel, Datan, wey si Abiram. Heini si Datan wey si Abiram iyan menge pengulu te menge etew he nekidsevaha ki Kora te kebpekidsukulà te Nengazen pinaaǥi te kegkuntedaha zan ki Moises wey ki Aaron.
10Piru mid-eveleng sikandan te tanà duma ki Kora, ne sikan 250 he sumusunud kandan nemematey pinaaǥi te hapuy. Heini he hitavù nehimu he petizaan diyà te menge Israilihanen.
11Piru is menge anak ni Kora, wazà mulà mebpatey zutun he hitavù.
12Is menge kevuwazan ni Simeon iyan is menge pemilya eni, Nemuel, Jamin, Jakin,
13Zera, wey Shaul.
14Iyan sikandan menge pemilya he ebpuun diyà te ki Simeon; 22,200 sikandan is langun.
15Is menge kevuwazan ni Gad iyan is menge pemilya eni Zefon, Hagi, Shuni,
16Ozni, Eri,
17Arod, wey Areli.
18Iyan sikandan menge pemilya he ebpuun diyà te ki Gad; 40,500 sikandan is langun.
19Si Juda zuen din dezuwa he anak he maama he iyan si Er wey si Onan, he minatey ziyà te tanà he Canaan. Piru zuen gihapun menge kevuwazan ni Juda he iyan is menge pemilya eni Shela, Perez, wey Zera.
21Is menge kevuwazan ni Perez iyan is menge pemilya eni Hezron wey Hamul.
22Iyan sikandan menge pemilya he ebpuun diyà te ki Juda; 76,500 sikandan is langun.
23Is menge kevuwazan ni Isacar iyan is menge pemilya eni Tola, Pua,
24Jashub, wey Shimron.
25Iyan sikandan menge pemilya he ebpuun diyà te ki Isacar; 64,300 sikandan is langun.
26Is menge kevuwazan ni Zebulun iyan is menge pemilya eni Sered, Elon, wey Jaleel.
27Iyan sikandan menge pemilya he ebpuun diyà te ki Zebulun; 60,500 sikandan is langun.
28Is menge kevuwazan ni Jose ebpuun diyà te zezuwa he anak din he si Manase wey si Efraim.
29Is menge kevuwazan ni Manase iyan is menge pemilya ni Makir wey ziyà te anak din he si Gilead.
30Is menge kevuwazan ni Gilead iyan is menge pemilya eni Iezer, Helek,
31Asriel, Shekem,
32Shemida, wey Hefer.
33Is anak ni Hefer he si Zelofehad, wazè din anak he maama. Piru zuen din menge anak he vahi he is menge ngazan dan iyan ensi Mala, Noa, Hogla, Milca, wey Tirza.
34Iyan sikandan menge pemilya he ebpuun diyà te ki Manase; 52,700 sikandan is langun.
35Is menge kevuwazan daan ni Efraim iyan is menge pemilya eni Shutela, Beker, Tahan,
36wey ziyà te anak ni Shutela he si Eran.
37Iyan heini sikandan menge pemilya he ebpuun diyà te ki Efraim; 32,500 sikandan is langun. Heini he menge pemilya is ebpuun diyà te ki Manase wey ki Efraim iyan menge kevuwazan ni Jose.
38Is menge kevuwazan ni Benjamin iyan is menge pemilya eni Bela, Ashbel, Ahiram,
39Shufam, wey Hufam.
40Is menge kevuwazan ni Bela, iyan is menge pemilya ni Ard wey ni Naaman.
41Iyan sikandan menge pemilya he ebpuun diyà te ki Benjamin; 45,600 sikandan is langun.
42Is menge kevuwazan ni Dan iyan is pemilya ni Shuham.
43Is langun he menge kevuwazan ni Dan he menge Shuhamnon; 64,400 sikandan is langun.
44Is menge kevuwazan ni Asher iyan is menge pemilya eni Imnah, Ishvi, wey Beria.
45Is menge kevuwazan ni Beria iyan is menge pemilya ni Heber wey ki Malkiel.
46(Duen anak he vahi ni Asher he si Sera.)
47Iyan sikandan menge pemilya he ebpuun diyà te ki Asher; 53,400 sikandan is langun.
48Is menge kevuwazan ni Naftali iyan is menge pemilya eni Jazeel, Guni,
49Jezer, wey Shilem.
50Iyan heini sikandan menge pemilya he ebpuun diyà te ki Naftali; 45,400 sikandan is langun.
51Umbe, is kahabet te langun he maama he menge Israilihanen he nesinsus 601,730.
52Ne migkaǥi is Nengazen diyà te ki Moises te,
53“Behina nu is tanà he egkepengevilin dan sumalà te kahabet te kada tribu.
54Is tribu he mezakel, behini nu te zekelà, is tribu he deisey zà behini nu te zeisey.
55Kinahanglan he pinaaǥi te ripa is kebehina zuen te tanà diyà te zekelà wey zeisey he tribu he egketuenan pinaaǥi zuen te sinsus.”
57Is menge kevuwazan ni Levi iyan is menge pemilya eni Gershon, Kohat, wey Merari.
58Ne ziyà te kandan ebpuun is menge pemilya eni Libni, Hebron, Mali, Mushi, wey Kora. Si Kohat iyan kepuun ni Amram,
59ne iyan esawa ni Amram si Jokebed he kevuwazan daan ni Levi. Diyà ianak si Jokebed te Ehipto. Si Amram wey si Jokebed iyan ginikanan eni Aaron, Moises, wey Miriam.
60Ne si Aaron iyan amey eni Nadab, Abihu, Eleazar, wey Itamar.
61Piru minatey si Nadab wey si Abihu hein nemuhat sikandan he migamit dan te hapuy he kenè diyè ebpuun te hapuy he egemiten para te kebpemuhata te Nengazen.
62Is kahabet te maama he menge kevuwazan ni Levi he senge vulan pehendiyà te metikang is keǥurang dan ne 23,000. Wazà sikandan iragkes diyà te ketivuukan he vilang te menge Israilihanen su wazè man kandan he vahin duen te tanà he egkepengevilin te menge Israilihanen.
63Iyan heini menge Israilihanen he nesinsus ni Moises wey ni Eleazar he memumuhat diyà te suǥud te Moab he kilid te Jordan he uvey te Jerico.
64Ne wazè en nesamà he uuyag duen te neragkes duen te nehuna he kedsinsus ni Moises wey ni Aaron he memumuhat diyà te sibsivayan he Sinai.
65Su zutun dengan, migkaǥi is Nengazen he siguradu he ebpematey sikandan diyà te sibsivayan ne wazà egkelibri kandan gawas ki Caleb he anak ni Jefune wey ki Josue he anak ni Nun.
