Moimai di vegu 8:29-39

²⁹Vima kikifa yaku Philip rofu niyo, “Yomirona kariota atafu bogiya.”

³⁰Ye Philip raga boi neyori, bi ina bi Sei di ago niyo amiye Isaiah di bura vegasa ini ago nigamo mina neidesi nikaiteyo, “Ya beika bura reyo mina vegasa bi diba nisa ba de?”

³¹Amiye tora yaku nikabai resi niyo, “Amiye yokoi yaku na oteimago vonisi bi diba nigida.” Resi raka niyo ma kariota ri keu risi inasa ameinu reyo.

³²Sei di ago bura rena vegamo bi mini: “Mamoe umuyegika afei boyadi kana, ma mamoe mida di ueta nugadedi vene di budari babo nido kana, bi ago yokoi de niyo.

³³Moi maena resi kota rena di ida dudu kota de reyadi. Ini tutubena vene bi kaere yaku nigo? Ini adina bi ini vegu mina konori bi koina niyo mini.”

³⁴Ourefeidena amiye yaku nikaiteyo, “Na ni, mina Sei di ago nido amiye bi kaere nigika nido? Iniye rofu nido ba amiye yokoi rofu nido?”

³⁵Kamini Philip ago nigi kora reyo; Sei di ago mina one ideri gutuna boyo Iesu di ago buni nioteimaro.

³⁶Ida boyadiri, bi koru yokoiri baesi okiyadi ma ourefeidena amiye yaku niyo, “Koru bi mini. Beika resi na bi babatiso de regida?”

³⁸Ourefeidena amiye yaku niyo dada kariota raga redo mina baesi are reyo. Philip mina amiyesa vakoi gogo koru ideri neyadiri, bi ina babatiso reyo.

³⁹Koruri gutuna dadi baeyadiri, bi Varika amiye di Vima yaku Philip moi etagae ri diyo. Ourefeidena amiye yaku ina dudusa de veyo, idu ada tora iniye regasa ini idama neyo.