Aposel 8:29-39

²⁹Odocob Kis Gun Filip madon, “Karis i cocobi cemenug laga,” don.

³⁰Odocob Filip cemenug limei uqa je hahun madec dana, Aisaia, uqana buk eu sasanijen dah men. Odimei uqa sisildon, “Hina jaqec je sanijigina eu wawin fogo donafo?” don.

³¹Odocob dana eu Filip jejeg hewi madon, “Oso uqa qee silditecebfi ija adi wawi fogo dugian?” don. Odimei uqa Filip karis ohis uqaca teceb biluwasannu cesusdon.

³²Anutna jaqec je dana eu uqa sanijina eu odi maden: “Uqa sipsip age qocnu ehi leginawe, sipsip nag dana bagic cacagogin tilii jeca qee tawenawe, eu odi uqa je oso qee madel.

³³Saen age cewudodoig tutuc qee gesildoloin. Uqana cebac bilec maha ina eu gohic men Eunu dana oso uqana sihulnu ihoc qee sildiaun,” en.

³⁴Odocob dana eu Filip sisildon, “Mataga, je hahun madec dana je i innu madena? Uqadodocnufo, qee dana osonu madena?” don.

³⁵Odocob Filip uqa Aisaiana jaqec je sanan mimei me je weledec jaqec je cunugnadec uqa Jisasnu me je eu silditon.

³⁶Odocob ale jic eu toodu numesi wa osona calesin. Odimesi dana eu madon, “Faga, wa ene nijia. Ija wa joitec oga tenafi in oso ija cahactigian?” don. Odocob Filip madon, “Hina Jisasnu wawin cunug meleecebfi wa joc ihoc ogan,” don. Odocob uqa jejeg hewi madon, “Jisas Krais eu Anut Melah ija wawi meleena,” don.

³⁸Odocob dana bamig selec eu uqa karis cofdoc dana madocob karis tuluen. Odocob Filip dana bamig selec euca wana numesi Filip dana eu wa jouden.

³⁹Odocob saen ale wanadec cali becebil Tibudna Kis Filip u hewi nuen. Dana eu Filip haun qee fel qa haun jic eu celeboii toodu nuen.