HECHOS 8:29-39

²⁹Tuhme ra̱hn Vaco Dendiohs nduco Felipe: ―Cuehn, cotone carro tih.

³⁰Cuahn che tuno Felipe carro me ne, chihnevan ye che rahndudo sa̱hn min libro che dirun Isaías, ne tumerune ye sa̱hn: ―¿A renahn ne ndudo tih che rahndudo ne ne?

³¹Ndahconan se yahn ye: ―Hua, te metah duh che te cuande u. Tuhme ya̱hve se ihyan che conda̱ ye chete carro me, cuhnde ye da̱ma nduco se.

³²Na̱n Ndudo yahn Dendiohs che rahndudo se ne, ndirun tuhca̱: Nduhca̱ che riquenda ihyan itecuche na̱n che ca̱hno ye ite ne, tihca̱ quenda ye ihyan. Nduhca̱ a̱ma itecuche lihn che hua rah te che rendu ihyan ite ne, tihca̱ ihyan min, te hua dehva ca̱hma ye.

³³Ndere ca̱ca nunde se yahn ye, ne ametah deh che ca̱hma ye, te hua nda̱ca duh che techeca̱de yahn ye numa cua̱co. ¿Duh co ca̱hma yahn nda̱ta yahn ihyan min?, te ca̱hno se ihyan, ne nda̱ca ye iyehnse cuh.

³⁴Tumerune sa̱hn min Felipe: ―Codin favor, ne cahme co u, ¿Duh yahn che tihca̱ dirun ihyan profeta me? ¿A yahn ma̱n ye, o yahn ta̱ma ihyan?

³⁵Tuhme cana̱n Felipe nde na̱n che rahndudo se, ca̱h cuande ye sa̱hn ndudo ndah yahn Dihvo vo Jesucristo.

³⁶Cuahn che nda̱ ihyan chahn a̱ma cua̱n na̱n che va nune ne, ra̱hn sa̱hn ndina̱n me: ―Muhn va nune, ¿a hua co cuedenuné ne?

³⁷Ndahconan Felipe yahn se: ―Ndete che ritahnó ne numacuahn chedave yahn ne ne, ta̱ca̱ hua, co cuedenune ne. Tuhme ra̱hn sa̱hn min: ―Ritahnó te Jesucristo ne, ihyan min che Da̱ya Dendiohs.

³⁸Chihquentiyon se che chan carro me. Tuhme cochahn se nduco Felipe na̱n nune me, ne chehdenune ye sa̱hn.

³⁹Cuahn che ndiquenda̱h ihyan chahn va̱n nune ne, quenda Vaco Dihvo vo Dendiohs Felipe, ne chehna̱n se ihyan. Tuhme ndonun yune se, cona̱hn se, ne a̱ma yeno se.