ᤛᤣ᤺ᤰᤕᤢᤰᤔᤡᤒᤠᤜᤠ᤹ 8:29-39

²⁹ᤛᤣᤛᤣᤔᤠᤱᤅᤡᤸᤗᤧ ᤑᤡᤗᤡᤵᤐᤧᤴ ᤔᤧᤳᤋᤢ. “ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤃᤧ᤹॥”

³⁰ᤜᤧᤰᤁᤩᤠᤱ ᤑᤡᤗᤡᤵᤐᤧᤴᤏᤠᤱ ᤗᤥ᤺ᤰᤋᤧᤖ ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤵᤐᤴᤏᤡᤴ ᤏᤡ᤺ᤖᤢᤖ ᤕᤢᤅᤧᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤑᤡᤗᤡᤐᤖᤧ ᤛᤣ᤺ᤴᤍᤥᤛᤢ. “ᤁᤴ ᤁᤧᤏᤡ᤺ᤖᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤡ᥅”

³¹ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤐᤥᤎᤰ ᤕᤠᤵᤔᤡ ᤁᤧᤈᤥ᤺ᤰ ᤁᤧᤒᤡᤒᤠ ᤔᤏᤠ ᤔᤧ᤺ᤴᤏᤣᤃ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤱᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤑᤡᤗᤡᤵᤐᤧᤴ ᤀᤢ᤺ᤳᤋᤢᤀᤠᤱ ᤛᤥᤖᤡᤰ ᤂᤢᤏᤧ᤹ᤏᤢᤀᤣ ᤕᤢᤰᤂᤢ॥

³²ᤂᤧᤸᤗᤧ ᤏᤡ᤺ᤖᤢᤒᤠ ᤛᤠᤶᤕᤥᤛᤠᤵᤗᤠ ᤗᤰᤁᤡᤴ ᤁᤴ ᤘᤕᤧᤖᤥ– “ᤂᤢᤏᤧ᤹ᤃ ᤛᤧᤳᤇᤧ ᤋᤣ᤹ᤔᤏᤠᤒᤠ ᤔᤧᤸᤗᤢᤰ ᤜᤧᤰᤁᤣ ᤆᤥᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢᤖᤡᤰ ᤁᤧᤏ᤺ᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤠᤱ ᤛᤫᤠ᤺ᤳ ᤁᤧᤕᤧᤵᤐᤠ ᤔᤧᤸᤗᤢᤰᤛᤠ᤺ ᤜᤧᤰᤁᤣᤀᤣ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ॥

³³ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤠ ᤔᤧᤎᤠ᤺ᤛᤢ ᤔᤧᤒᤡᤖᤢᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤖᤥ॥ ᤁᤢᤔᤢ᤹ᤀᤡᤍᤠᤱᤛᤠᤖᤧ ᤁᤢᤕᤠ᤺ᤶᤒᤣᤀᤥ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤖᤥ॥”

³⁴ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤣ᥅ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ. ᤘᤣ᤹ᤛ᤻ᤔᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ᥅ ᤀᤡᤱᤃᤠ᤹ ᤐᤥᤎᤰ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ॥”

³⁵ᤜᤧᤰᤁᤣ᤺ᤸᤗᤧ ᤑᤡᤗᤡᤐᤖᤧ ᤛᤠᤶᤕᤥᤛᤠᤵᤗᤠᤒᤠ ᤒᤠ ᤁᤴ ᤗᤰᤁᤥᤗᤠᤶ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱᤅᤡᤴ ᤐᤥᤎᤰ ᤆᤥᤃᤢᤸᤗᤧ ᤂᤧᤴ ᤛᤧᤓᤰᤐᤧᤸᤗᤧ ᤏᤛᤠ᤺ᤴ ᤆᤥᤃᤢᤖᤥ॥

³⁶ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤴ ᤗᤠᤶᤔᤥ ᤗᤠᤶᤍᤡ᤺ᤰ ᤆᤥᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤆᤫᤠ᤺ᤳ ᤁᤧᤏᤧᤒᤠ ᤋᤧᤴᤏᤥ ᤁᤧᤖᤧᤳᤇᤡ॥ ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤛᤣ᤺ᤴᤍᤥᤛᤢ. “ᤀᤥᤔᤧᤳᤋᤧ᤹. ᤁᤵᤔᤥ ᤆᤫᤠ᤺ᤳ ᤏᤧᤖᤥ॥ ᤀᤡᤱᤃᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤔᤧᤛᤢᤰᤁᤠᤴᤒᤡ᥅” ((ᤑᤡᤗᤡᤐᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤠᤰ ᤁᤧᤏᤡᤱᤘᤠ᤹ᤖᤧ ᤏᤛᤠ᤺ᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤧᤛᤢᤰᤋᤢᤖᤥ” ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ᤑᤢᤛᤠ᤺ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢᤱᤗᤥ॥”))

³⁸ᤜᤧᤰᤁᤩᤠᤱ ᤂᤧᤴ ᤀᤴᤗᤠ᤺ᤴ ᤕᤧᤵᤔᤠ ᤐᤠᤱᤄᤢᤀᤠᤱ ᤂᤢᤴᤇᤡ᤹ ᤕᤥ ᤆᤫᤠ᤺ᤳᤋᤥ ᤐᤣᤛᤡᤀᤠᤱ ᤑᤡᤗᤡᤐᤖᤧ ᤂᤧᤴ ᤒᤵᤋᤡᤛ᤻ᤔᤠ ᤐᤡᤖᤢ॥

³⁹ᤂᤧᤱᤜᤠ᤹ ᤕᤥ ᤆᤫᤠ᤺ᤳᤋᤥᤗᤠᤶ ᤗ᤺ᤴᤍᤧ ᤌᤠᤅᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤂᤡᤔᤥ ᤑᤡᤗᤡᤵᤐᤧᤴ ᤐᤰᤂᤢ ᤋᤣ᤹ᤖᤢᤀᤠᤱ ᤀᤠᤈᤥᤳᤋᤥᤛ ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤳᤋᤢᤖᤥ॥ ᤂᤧᤵᤔᤥ ᤂᤢᤏᤧ᤹ ᤛᤡᤈᤖᤡᤕᤠ ᤔᤧᤱᤃᤧᤳᤋᤣ ᤌᤠᤖᤡᤰ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤖ ᤐᤣᤖᤥ॥ ᤛᤧᤓᤰᤐᤧᤸᤗᤧ ᤂᤢᤏᤧ᤹ ᤕᤠᤶᤔᤥ ᤔᤧᤏᤡ᤺ᤛᤢᤴ. ᤁᤖ ᤂᤧᤴ ᤛ᤺ᤳᤋᤧᤖ ᤁᤢᤗᤠᤶᤍᤡ᤺ᤰᤁᤥ ᤐᤣᤖᤥ॥