Honowok Nair 8:29-39

²⁹Roh Kudus hopon Pilipus, “Laa ma'uraniyala kerete onneni.”

³⁰Pilipus laa na'uraniyedi kerete onneni ne, an derne ri onne mahan lelese Yesaya nin horok. Ai na'ukaniyale na'ahenia, “Hi'ihewi? Makrom'u lese horok onneni mauroin nin panaeku, ee ka?”

³¹An walhale, “Lo'o ri ka napa'ahe, hi'i hehewi ya auroin nin panaeku?” Enime'ede ai naka'uk Pilipus, “Mai ha'a wewerre ainu'u kerete.”

³²Horok Lape Lirna an lelese onne na'aheni heheni, ‘Ai onne, naisa pipduma waku ida man rodi laa resne, la naisa pipduma man makromon tori wulunne, maa ka na'umee, ai me'e ne ka na'oho, kan wakunu haida.

³³Ri na'ihoru na'idaru Ai onne, la nala hunukum ma ka namnenehe na'alono hono'ok kanail ma namlolo. Ai kan minle noho wawan nalo'ol, ono ri nesne ai penia upun anan kaale me'e, de ri kan horok me'e.’

³⁴Or'onno lalapa onne na'aheni Pilipus, “Pipduma onne wekel inhoi? Nabi Yesaya mehen wekel kemen, ee ri namehin?”

³⁵Enime'ede Pilipus napa'aha Horok Lapeni Lirna La'an leke konohi ai Yesus Nin wanakuku wawa'an eni.

³⁶Hir raikoro ai kerete makun, rakan onnida oir aile, de ri Etiopia na'ahenia, “Po'onale, oire me'eni me'e! Inhawa kawala ika makun penia kam ulutada ya'ue?”

³⁷Pilipus na'ahenia, “Lo'o makrom'u akin naili'il Yesus kokkoo, ik kala'a oire leke ulutade pape.” An walhale, “Ya akin naili'il Yesus Kristus eni namwali Makromod Lalap Ananne.”

³⁸Ende an hopon ma nodi kerete paliyedi lolo onne, la woro'ohe kopur laa oir raram nanumene Pilipus ulutade.

³⁹Hi ramharedi oir raram mai paharne, namlilinnohi Makromod Nin Roh naledi Pilipus laa onno namehin, de Etiopia onne kan do'on ai me'e, maa ai akin nahuwa'an wake'edi me'e, la nala'a mamani laa nina leke.