Maol Amom Aposeli 8:29-39

²⁹Eaꞌ Ambal buꞌunai Godi naꞌipa Filip naꞌi, “Inaꞌ foꞌo felefeleꞌma aman anamba nefeꞌ neloma wilkar nanimba.”

³⁰Eaꞌ Filip nasagih nafeꞌ felefeleꞌma anen, aꞌ nameꞌ aman anamba natalifa basef ifimba Aisaia nandaꞌafi. Eaꞌ Filip nahaliꞌana naꞌi, “Inaꞌ negawa basef ifimba kofagefa deiꞌ natalifif nagafiꞌii, aꞌa owaꞌ?”

³¹Eaꞌ aman anamba nagwa basef naꞌi, “Iꞌi anin epen owaꞌ nihimbaꞌmefa, deiꞌ egawa basef ifimba iꞌimama?” Eaꞌ naꞌipa Filip naꞌi, “Inaꞌ lotai netoma neloma aeꞌ.”

³²Basef ifimba duꞌwanif Godi anen nagatalififi fagaꞌiasa Jisas faꞌi, “Esis saoꞌwana nafeꞌ siꞌi sipsip ama saꞌi sohana nogagaꞌ. Anen siꞌi sipsip noganai esis sahapilana sagatopaꞌmana auf ananimi, anen ina nandaꞌam feꞌ atin naꞌoh, owaꞌatin. Eaꞌ naꞌamba atina aman anamba, ina malogol gagalana, owaꞌatin.

³³Esis sapaꞌagana endilisi eaꞌ ina sandaꞌmana kota basef usiꞌifi, owaꞌ. Anen awasi akana ma anis sitilis soganifa basefas. Deiꞌ main, sahana nagaꞌ sagia ambal ananili ma ina ataꞌ nope itap wapani, aꞌowaꞌ.”

³⁴Eaꞌ aman anamba dembinai nugumafi maola kwini naꞌipa Filip naꞌi, “Aeꞌ aꞌi ihaliꞌina. Profet anamba naꞌi ami ma deiꞌ nandaꞌ basef ifimba? Naꞌifa anen atona aꞌa naꞌifa anin epen daian?”

³⁵Eaꞌ Filip naꞌi basef nawalapefa aman anamba. Nasumbai basef ifimba duꞌwanif Godi aman anamba nagaꞌiefi fafeꞌ fafeꞌ eaꞌ nawalapai basef buꞌwafi Jisasi.

³⁶Amom biam maꞌi mafeꞌ owaꞌ, matagama anemb walemb. Eaꞌ aman anamba naꞌipa Filip naꞌi, “Niti walemb ambamba betah. Deiꞌ ataꞌ main nape niliꞌama aeꞌ egefaꞌ baptais?”

³⁷Eaꞌ Filip naꞌi, “Iꞌi inaꞌ nihapifana endilisi ma nembel ineꞌimbili, inaꞌ daoꞌ ila.” Eaꞌ nagwamana basef naꞌi, “Aeꞌ ahapifa Jisas Krais anen nogamana Godi.”

³⁸Eaꞌ naꞌias a main, wilkar negetawai, Filip naloma aman anamba dembinai misilaꞌ mafeꞌ mowala walemb. Eaꞌ Filip napisiꞌana.

³⁹Eaꞌ amom biam makwaha walemb mandagiai wataꞌita, kwafalis atis Ambal buꞌunai Dembinaii nofaꞌ Filip aꞌ nafeꞌ. Eaꞌ aman anamba dembinai ina ataꞌ natolona wapani, aꞌowaꞌ, dolomana. Eaꞌ anen sonahana nandagala naila ufiaꞌw ananiꞌwi nafeꞌ.