Loc Hechos 8:29-39

²⁹Afe llezica Ñuera Joreño Felípena daɨde: —Jadílloicɨmo áɨnozillano afénomo nabairi, —daɨde.

³⁰Aɨnozillano, Felipe afémɨe Isaías cuegáuaillaɨ facáduana cacade. Iemona íemo jɨcánote: —¿O facádoga uaina meita onódɨo? —daɨde.

³¹Jira afémɨe uai ote: —Cuemo jino llóitɨmɨe iñédeza, ¿nɨɨe izói ónoitɨcue? —daɨde. Iemona Felípemo caifo ie dɨga dáanomo ráɨillena jɨcade.

³²Juzíñamui Cuegáuaimona afémɨe facádoga uai áfena daɨde: Oveja izói tɨ́izaillɨnomo uiga. Oveja jiza abɨ cuidódɨno uiécomo úriñedɨmɨe izói táɨide, afe izói afémɨe jaca nɨ́ɨfuedo úriñede.

³³Afémɨe ɨere jámairuigamɨe; jaɨ́cɨnaidɨfuena íemo rairuídiaɨoɨ. ¿Ie ñue illáfuedo mei bu úrille? Mei ie cáajano bie énɨemona nɨné táɨnocaide, —daɨde.

³⁴Jira illaɨngo abɨ rɨ́imɨe Felípemo jɨcánote: —Cuemo llone, ¿bumo úrite uai lloraɨma? ¿Nɨbaɨ dama íemo úrite? ¿Nɨbaɨ jɨáɨmɨemo úrite? —daɨde.

³⁵Jira Felipe afémɨe facádoga Cuegáuaimona Jesús úrillauai íemo jino llote.

³⁶Jaɨnoi illánodo jailla llezica rɨ́imɨe daɨde: —Benomo ite jaɨnoi. ¿Birui áfejido cue báutizanidɨcue? —daɨde.

³⁷Jira Felipe daɨde: —Nana o comécɨdo o ɨ́ɨnoiadɨ báutizarellɨo, —daɨde. Jira afémɨe uai ote: —Jesucristo Juzíñamui Jitoza áfemo ɨ́ɨnotɨcue, —daɨde.

³⁸Iemona jáiralloicɨ mozíñota ille dɨné jáidiaillɨnoɨ. Dɨnomo Felipe ie báutizade.

³⁹Illémona arɨ abɨdo jáidiaillɨnoɨmo, Juzíñamui Ñuera Joreño Felípena oni uite. Iemona rɨ́imɨe íena jaca nane cɨ́oñede. Mei dama ie énɨemo caɨmare jaide.