Los HECHOS de los apóstoles 8:29-39

²⁹Quiaj Nangaj Espíritu ocueaj Teat Dios tasaj a Felipe: ―Quiür itüch aaga carret quiün, indüüb mamb ―aj nej.

³⁰Quiaj tamb a Felipe matüch a carret. Tanguiay aaga naxey quiaj tenguial mateow Mipoch Teat Dios leaw tarang Isaías. Tatün manguiay, tasaj: ―¿Teat, ixom imeaats wüx aag temeteow quiaja? ―aj.

³¹Quiaj tapiüng aaga naxey: ―¿Nguineay sanaxom ximeaats sitiül ngo majlüy aljane maquiaach xic? ―aw. Ndoj quiaj tasaj a Felipe majtep tiül a carret chetem aweaag.

³²Aaga Mipoch Teat Dios niüng tenguial mateow, apiüng: Wüx taquiüraab mamb mandeow, ajlǘyan ngo menojteay, atnej nop sap. Atnej nop quicheech sap wüx ajerep milan nej, ngo mepaj. Atquiaj a nej aton wüx tandeow, ngo majcüy majaw monbiy nej.

³³Nej tüünd mamongoch monxing, ndoj ngome tajaraw cuane asoet. ¿Jane alndom mapiüng meáwan ngo majneaj tarangüw wüx ombas nej ajcüwa nipilan quiaja? Cos tambiyaw nej ningüy wüx iüt.

³⁴Quiaj tatün manguiay aaga naxey quiaj, tasaj a Felipe: ―Isaj xic teat, ¿jane wüx ombas apiüng aaga nendeac andeac Teat Dios quiaja? ¿Apiüng wüx nejáyan quiaja, ngwüy apiüng wüx alinop aljane? ―aj.

³⁵Condom Felipe tapots maquiaach nej ajan wüx aaga poch quiaj. Tapots masaj nej wüx Mipoch Teat Dios leaw tandeac Teat Jesús.

³⁶Condom wüx tatüchiw niüng ajlüy yow, quiaj tapiüng aaga naxey quiaj: ―Joyaj yow ¿quia ngondom nayar yowa? ―aw.

³⁷Quiaj tapiüng a Felipe, tasaj nej: ―Alndom sitiül iyaag naleaing lajmel tiül imeaats Mipoch Teat Dios ―aj nej. Quiaj tapiüng aaga naxey quiaj: ―Nganüy lanapiüng naleaing aaga Teat Jesucristo quiaj Micual nej Teat Dios ―aw.

³⁸Quiaj tapiüng lombom a carret. Condom tawüw tiüt ijpüéj, tambüw tajmeliw tiül yow, Felipe maquiiüb aaga naxey quiaj. Quiaj tüüch nej yow a Felipe.

³⁹Condom wüx tawüw imiün tiül yow, quiaj a Nangaj Espíritu ocueaj Teat Dios tawün quiaj a Felipe. Aaga naxey quiaj, ngo maxom majaw nguia tandüy a Felipe. Condom tamb maquiiüb mitiiüd nej apac omeaats.