Kristus Klosan Lian 8:29-39

²⁹Maromak Kmalar Lulik katak baa Filipus nebee nareꞌis aan baa kareta nia, hotu nasoru ema boot nia.

³⁰Kreꞌis tiꞌan, nia rona ema boot nia leno Yesaya niakaan hakerek. Hotu nia nusu naꞌak, “Ama! Ita hatene hakerek mak ita leno nia ka lale?”

³¹Ema boot nia nataa naꞌak, “Lale! Musti noo ema nalore baa haꞌu lai, foin bele katene. Saꞌe mai, tuur mo haꞌu iha neꞌe.”

³²Hakerek mak ema boot leno nia, lian nuneꞌe: “Nia hanesan bibi malae mak ema dada nodi atu sona noꞌo. Nia hanesan bibi malae oan mak ema teri rahun, mais Nia la nakmee kois. Nia la loke ibun. Nia la nataa lia fuan rohan ida.

³³Ema deꞌan nahaat Nia. Ema nakotu Niakaan lia la nodi moon. Masik Nia la noo sala moos, ema noꞌo luku. See mak bele dale nosi Niakaan husar-binan? La noo, tan ema noꞌo Nia iha raiklaran tiꞌan.”

³⁴Leno hotu tiꞌan, ema boot nia nusu Filipus naꞌak, “Nuꞌunabee? Bei Yesaya dale nosi niakaan isin lolon duꞌuk ka, nosi ema seluk?”

³⁵Rona nunia, Filipus moos nanorin lia Yesus baa ema boot nia nosi Yesaya niakaan hakerek ohin nia, nebee nia bele natene dalan moris atu tuir Yesus.

³⁶Sia sei noꞌi laꞌo, ema boot nia naree wee iha mota ida. Nia dale teri Filipus naꞌak, “Ama! Maree! Noo wee iha nebaa. Kalo la noo saseni, ita tuun ona nebee ama sarani haꞌu.”

³⁷Filipus nataa naꞌak, “Diꞌak! Kalo ama fiar tebe-tebes baa Naꞌi Yesus, la noo saa ida mak saseni! Mai tuun ona, nebee haꞌu ksarani ama.” Hotu, ema boot nia katak naꞌak, “Haꞌu kfiar tebe-tebes kaꞌak Yesus nia, Naꞌi Maromak Oan mak Nia natudu kedan hori uluk.”

³⁸Hotu, ema boot nia naruka kareta nanawa. Sia tuun baa wee, Filipus moos sarani kedas nia.

³⁹Oras sia rua sai nosi wee laran, Kmalar Lulik foti nola Filipus baa fatin seluk. Ema boot nia la naree Filipus ona, mais nia laꞌo liu nodi neon diꞌak lo-loos.