Taiya dle so 8:29-39

²⁹Epalati Hela꞉dle Sokota Pilipi watle epo atlaiyo, “Wa꞉ tame oplami ya꞉ mateka꞉pi dla halane,” diyo.

³⁰Epapalati Pilipita oplami mateka꞉pi dla kukulumtamama dallati oplamita Aisaya buka tle sesa꞉mpolla daliyo. Epalati Pilipita ya꞉ watle epo atlaiyo, “Wa꞉ wa꞉ta sesa꞉mpola yu ya꞉ dulu kokoye wa꞉ malamata꞉?” diyo.

³¹Amasiyama oplamita ya꞉ watle epo atlaiyo, “Hao, ya꞉ dulu koko pona꞉malamana. Adipalati, oplami haleta yu i ya꞉ dulu kokoye na꞉ po-imasemde,” diyo. Ya꞉ epo atlepame ma Pilipiye ya꞉ mate matame polane diyo.

³²Epedeme ya꞉ta sesa꞉mpolale yuye ipo, “Ya꞉ye aliya halo some yumuluwedeme semtauwapo. Ya꞉ye sipi aliya dlalo kestlati woloma yu dimi hayeme elemdiye, epapele some eluwapo. Epammama ya꞉ yu hale po-atlana.

³³Opata ya꞉ye yimka꞉mala demama koko pa꞉le ya꞉ dla poka꞉ka꞉dle kokoye halomyeuwapo. Epo ya꞉ye ya꞉ elo dla hallowe pohatitimana. Epame ta꞉lamo hema ya꞉ta hallowe pasakaloye mosukulu kestauwapo.”

³⁴Epalati ya꞉ta Pilipi watle epo atlaiyo, “Na꞉ atlane, God tle yu hapame molo atlalo oplami iye ana koko atlema꞉? Ya꞉skamu ya꞉ koko atlema꞉, o oplami hale koko atlema꞉?” diyo.

³⁵Epalati asiyama Pilipita yu i dulu kokoye ya꞉ watle imama ka꞉dle yu Yesu Keliso kokoye ya꞉ watle atlaiyo.

³⁶Yia꞉ta madipata tamalemama aloma yemala dla tame woyamaiyo. Epalati Itiyopiya oplamita Pilipi watle epo atlaiyo, “Wa꞉ natine, aloma yemala ipiye. Epedeme na꞉ta yú tulluweye apata na꞉ api himomelema꞉?” diyo.

³⁷Pilipita asiyama epo atlaiyo, “Wa꞉ dupa dulu dla mikadepe dle ellepiye, eta wa꞉ yú tulluwe ka꞉dena,” diyo. Epalati asiyama Pilipi watle epo atlaiyo, “Yao, na꞉ Yesu Kelisoye God Yamipo demama mikadepe dema,” diyo.

³⁸Epalati Itiyopiya oplamita ya꞉ koa hamsela꞉lalo oplami watle “koaye medla hedene,” diyo. Epame yia꞉ta madipatata tulume aloma dla ha꞉ha꞉mama Pilipita Itiyopiya oplamiye yú dla ka꞉staiyo.

³⁹Epame yia꞉tapo aloma tle matale oloma edla Lod ya꞉ Hela꞉dle Sokota Pilipiye hamame mo hale pateka꞉mu Asotus dla tame pameliyo. Epalati Itiyopiya oplamita ma ya꞉ ponatiyo. Epame ya꞉tapo tamama siyele mate ya꞉ mo dla taiyo. Amasiyama Pilipita Asotus mo dla woyapame God yu atlepo matle Kasaliya mo dla tamama mo yimlala hapuloma dla God yu atlamtaiyo.