Pakeke 8:29-39

²⁹Ma Oni Riringa i ria Pilip ve, “Eso totho a karis aken nge.”

³⁰Ma Pilip i tho totho la ma i nongpol ako toko aken i tital erere ako ini riong elnga a Aisaia ile. Mako Pilip i nina i ve, “Lomum mire nge riong ako ong tital i imirenga, eve avele?”

³¹Ma toko aken i olal i ve, “Aro ve toko e i patoral tho nge avele, aro lemik mire nge i vava, e? Esa me mo men tomo nge tho a karis nge.”

³²Lamako Pilip i roa. Na erere epee aken Itiopia anga i tital i, i vene: “O ti toko aken la, ranga ve ini sipsip ako aro o so rin i, ma toko aken i pesa iwo avele ranga ve ini sipsip itun ako o soro ini thoing. Nako i mit poreng inga.

³³Ma o palemarau i, ma o pamit i e riong na itepun e avele, aveto o paomelal polpol inga i. Itun ol e avele ako aro i tepola ol i, eneke ile mimiong ake ru a ulue kene i vus.”

³⁴Ma toko kimanga aken i nin a Pilip ve, “Riong elnga aken i ri aken nge anga? Nge isivenga, eve nge toko relnga, e?”

³⁵Mako Pilip i rirumu i a toko aken nge, ma i patea nge erere epee aken, ma i ri nge Panongpolong Sivenga ako nge a Jisas.

³⁶Ma or paini o tho a so lopat ma o espot e pen ako thei i voth nge. Ma toko kimanga aken i ria i ve, “Thepol thei re ake. Ur nekenga ako i mitrup ol tho ako aro tho el paninuong, e?”

³⁷Ma Pilip i ria i ve, “Aro ong el paninuong tova lomumo nge a God nge opom alavusnga.” Na i olal i ve, “I nunganga, lek lemioong lale ako ve, Jisas Krais ini a God Itun.”

³⁸Lamako i ria mo karis i mitu. Ma Pilip ome toko kimanga aken, or paini o esu a thei la. Ma Pilip i paninu i.

³⁹Ma or paini o esa a thei me, na a ur e avele, nako God Ioni Riringa i elteta a Pilip. Ma toko kimanga aken i thepol ol i avele. Ma ilemi sivenga na i es ol nge sovengalo ako i es nge la.