Miti Mânec 88:3-16

³Maŋ qâqâtâc‐nanezi ʒâic manaku gapeckekac, â juju‐nanezi hâmoc hae bâqiŋkekac.

⁴Ŋiczi nore manapie nombâŋko hukopac ekac, jujure tâpiri‐nanezi hesackekac.

⁵Qâŋɋâŋne jaŋere ŋondeŋko fokopac tinac ekac, qâhâmoc‐jopakicne ʒâŋeruŋko foeŋgopieŋ iŋucne tinac; erâ megaonec batarac‐jopakicne, eme mocwâc mi manasuc‐jopaekic jaŋe iŋucne.

⁶Go biac mâreŋmaŋko tuŋnutec hukopac, nombâŋ ʒorao, duŋdapâc maŋko.

⁷Kimbeŋgezi mâretec ŋemacnukac, â sirigezi qâurucnu‐fârekac.

⁸Go âgofâc‐nane ejaretec bâec banareŋgopieŋ, jaŋe nore manapie wiac hâhâwicne ekac; motâc henarekicnere qiŋquŋkehuc fokopac.

⁹Ʒâic busâqoczi enarekume ʒâŋe‐nane sisifucne ekac; no ʒoaŋ sâc, Wofuŋ, go wâsicguhuc foekopac, me jahec‐nane goraopec sicnehuc juekopac.

¹⁰Go hâmokicne jaŋerao mâsi moc baekic me? Qâqâtâc‐jeŋiczi faharerâ muteŋgueŋgopieŋ me?

¹¹Ʒâŋeruŋko aki anonoc moc mutaniŋkeeŋgopieŋ me? Me hâmoc haeo jauŋ fârige moc musokazo?

¹²Dapâcmaŋko mâsigere fuŋne manaeŋgopieŋ me? Â ninikec mâreŋko bâbâpiaŋge fua tâcnerâ foekac?

¹³No ine, Wofuŋ, go wira wâwâsic egareekopac, uupictea nunumu‐nanezi fâ bâfuacguekac.

¹⁴O Wofuŋ, go wemocte suŋgiŋnuekic? go wemocte ʒâŋe maige bâsoŋke‐nareekic?

¹⁵No ɋieonecteaŋ huc ʒâichec juhuc hâmoc bâqiŋke jupac, enaretec bipic tatara juwefuku maŋnane omaekac.

¹⁶Kimbeŋgere ʒocbâruŋzi norao fisi fotâcnewec, goraonec wiac hâhâwicnezi imacnuwec;