Salmos 88:3-16

³Dxedú lazra' lu da cale̱la ca' da dxaca na chia', ne ba zua' gatia'.

⁴Dxeleque bénneache neda' ca tu benne' gate, lawe' da dxátele̱'e̱ ni'a na'a.

⁵Nagá'ana' cá'aze ládujla benne' gate. Naca' ca benne' gulátie̱' lu wedil-la, ne zaj de̱' xe̱dxu ba ca', benne' ca' québedxa dxajsá lazru', Dios, ne québedxa zaj xu'e̱ lu na'u Lue'.

⁶Dxaca chia' cáte̱ze ba nuzú' neda' tu xe̱dxu zren naga naca chul-la, ne nácale̱'e̱ situj.

⁷Dxéqueda' dxezrá'le̱'u neda'. Da dxaca chia' naca na ca dxazia' zran xeajxruza zri'a chee̱ nísadau'.

⁸Be̱nu' belexebiga bi ljwezra' ca' naga zua'. Be̱nu' neda' ca tu da dxusegute na benne' ca'. Naca' ca tu benne' xu'e̱ lizre xia ne quebe gaca xedxúaje̱'.

⁹Dxelechul-la xiaj lawa' ne̱ chee̱ da dxezí dxezaca'. Xúgute̱ zra dxuláwizra' Lue', Xrana' Dios. Dxechisa na'a lau Lue'.

¹⁰¿Dxúnquezu' xel-la' waca chee̱ xabáa dxácale̱nu' benne' gate ca'? ¿Dxelexasa benne' gate ca' dxelúe lá'ane̱' Lue'?

¹¹¿Dxuluchalaj benne' zaj nagache̱' lu xe̱dxu ba chee̱ xel-la zri'i lazre' chiu', na' dxuluchalaj chee̱ da li lazre' chiu' benne' zaj xu'e̱ lataj chul-la chee̱ benne' gate ca'?

¹²¿Welexúnbea benne' zaj xu'e̱ lataj chul-la na' ca naca da zrente̱ da dxunu', na' welexúnbea benne' zaj xu'e̱ naga quebe nu dxajsá lazre' le̱' ca nacu' xrlátaje?

¹³Neda' dxuláwizra' Lue', Xrana' Dios. Xúgute̱ zila dxezrín lau' da dxenaba' Lue'.

¹⁴¿Bizr chee̱ na' dxebéaj xíchaju' neda', Xran? ¿Bizr chee̱ na' quebe dxenná'u neda' chee̱ gácale̱nu' neda'?

¹⁵Dxezí dxezaca', ne ba zua' gatia'. Nácatea' bi cuíde'te̱ dxedéa' xel-la' zi' da dxudeu' neda', na' dxedú lazra'.

¹⁶Dxéqueda' dxezrá'le̱'u neda'. Da dxuchebu' neda' ba bsedú na lazra'.