Miti Mânec 74:4-22

⁴Râsifâcge jaŋe tiri hae ʒoŋagao owa sâko embiŋ, jaŋe jaŋacne filac fârepie feha ma âkendâŋnembiŋ.

⁵Motâc faicpec jâczi hendiŋ bakicne fowec, i râriczi henʒaŋ qanʒaŋnembiŋ.

⁶Erâ jâczi metâ basarickekicne doma rawec, i râric â hamazi hezu henʒaŋ embiŋ.

⁷Jaŋe tiri ufuŋge turuŋkepie ʒawec, ʒâŋegere fic bâsâqore‐fârembiŋ.

⁸Jaŋe mumbiŋ, “Nâŋâc omaec‐jopanʒepeneŋ,” ehuc hae piicko nunumufic ʒoczi rike‐fârembiŋ.

⁹Tirima‐nâŋec mocwâc mi doma rame honeŋgopeneŋ; ŋondeŋ‐nâŋecko porofete moc mi junârekac; eme wiac kecʒi mo dameŋko taraocmu i mi manaŋgopeneŋ.

¹⁰O Anutu, râsi e wezimucko mururuc i beheocmu? Kisâ e ʒâŋege musoriŋkehuc jaha juocmu me?

¹¹Go fuŋne weniŋucte akic‐jopakic? Mefârege wemocte sakarekic?

¹²Anutu go mârâc jaha Wofuŋ Sâko‐nane jumeŋ, ehuc mâreŋŋic ŋondeŋko bâbâpiaŋ gie bajumec.

¹³Go tâpirigezi hâwec bâtâcnemeŋ, â ʒâkâŋte momori utune hefâuckemeŋ.

¹⁴Go oâ qizecne qanʒaŋnemeŋ, erâ biucne kâte qowi jaretec nâmbiŋ.

¹⁵Go qânâ hefâucketec opâ ʒâŋe fuawec, â opâ fifisine hezicketec kereŋkewec.

¹⁶Go ʒoaŋte rune jukic â ŋafere iŋuc jaha, goki hâcne mosa â ʒoaŋ râec‐jofameŋ.

¹⁷Mâreŋ qaŋeŋne gokizia basanaŋke‐fâremeŋ; hoemaŋ â ʒoaŋ dameŋ i goki wâc mutec fuawec.

¹⁸Wofuŋ, go râsizi mu ruruc ekac irec manasuzemec, ŋicguru hehesicnezi ʒâŋege musoriŋkeeŋgopieŋ.

¹⁹Ŋicfâcge jaŋe râsi jaŋere meo mi râec‐jopazemec; qarâ suriŋnefâcge jaŋere jujure ninikec mi ezemec.

²⁰Ʒâʒâficgere mana mezac ezemec; haesoŋko sindaŋte toma bocjaha forakac.

²¹Ro waha âte ejarekicne jaŋere faio mimi mi fezejec; hapetac â qarâ suriŋne jaŋe ʒâŋege mumbiaŋkenʒepieŋ.

²²O Anutu, go faharerâ gahacne dâŋ ŋezickec; hehesicne jaŋe ʒoaŋ ʒora mu ruruc egareeŋgopieŋ irec manasuc.