Psalms 74:4-22

⁴Nika kager kari memek alo ngata te kuwim laili ni te nanga biguwukasam mu ningi kapaman; nuna nunga guang kiwol ago balayam wore ningi awu karogo namaman.

⁵Nuna burir te tam kaura ko kari nunga kiwem beteman.

⁶Nuna kiwol anapeya ningi mu burir manga barasam se te pakakumu maguwu sapaman.

⁷Nuna nika bagara kuwim laili mu kaiman se kani malilaram; nika bagara kuwim nika nip biya karogo mu kiwem duap duap te karur tuguman.

⁸Nuna nunumi manorman, “Ana aitakta nunga moa parusuwura biya parusuwunakko!” maman; uwuta balu se biguwura kuwim suen la Kaem te nup patawukasan mu kai sapaman.

⁹Ana aitak Kaem ko kiwem bibiya duap duap bo ta me arigisan; Kaem ilak tuatara ko kari bo me ta bagoso; se kiwem imi tom amaruya menarukko mu ana bo yam ta me ko ikisan.

¹⁰O Kaem, tom awila nunguningkiri kager kari memek ewere nika gusirmonko? Nuna butata nika nip maguwu se lagamonko e?

¹¹Ni awuk se kiting kalem, kiting sokel garagar wore awuk se kalem? Kiting kalem wore apur ale nunga maguwurko!

¹²Bare O Kaem, ni aninga king, ni girakala la wore bagasam; ni keta ali imi lilim sangaru tasam.

¹³Ni keta ka sokel aora biya wore te gagi pagaru ilagala awurem; ale gagi ko mel memek bibiya mu nusupuling ita pakakumurem.

¹⁴Ni keta gagi ko mel memek Leviathan mu supuling suen la ita parusuwurem ale sor merang mu ko buruk kausik se inangnang anapeya namonko nungarem.

¹⁵Ni keta yu tingawara mu se, yu palenga namawara mu nunga barukem se naguwasan; ni tala balem se yu bibiya nungumik maraka mena mu maraka namaman.

¹⁶Woremkalal se tirom mu am nika la; ni worem se sige nuguwim nungarem.

¹⁷Ni keta ali imi lilim ko tom bita bita karogo namerem; ni worem ko tom se tuwik ko tom nungem.

¹⁸O Yawe, kager kari memek nika gusiman wore ko kamin ares mauk, se kariimet ikia ningo mena, nika nip balu maguwuman wore ko ikiko.

¹⁹Nika inangnang biton yawara mu, mel diwang memek nuguting te me bitarko; nika kariimet, ikup memek giman mu, nunga kamili me sapa se lagarukko.

²⁰Nika den kalem mu ko kamili me saparukko, mu awuk, tiromorom ko kari memek alo kager daong ko ali sor ira sapaman.

²¹Buta se kariimet nunga bita maguwuman mu nungarkiwer se me dola namamonko, mena; nuna kituwura guat se nungumik mel mena bare nunga sangaru se nika nip patawumonko.

²²O Kaem, bares ale ni keta ka kiwem ningo diram wore te sokel ago anirukko ko baluko; kariimet memek ni ko ko den alel balu lagasan wore ko ikia toko.