Miti Mânec 71:3-24

³Goki qânâuŋ enarehuc sabecnuc, huec sanaŋ enarehuc ŋezicnuc, go hâcne qânâ‐nane â huec‐nane.

⁴O Anutu, go sindaŋŋic jaŋere meonec bataracnuc, ŋic hehesicne â ʒâic bâbâfuare aŋac mamana jaŋere meonec.

⁵O Wofuŋ, go hâcne woricgukopac, no ɋieonecteaŋ Wofuŋ gore mamanac jupo.

⁶Fuapoonecteaŋ gorao roweckehuc jupo, goki hâcne neŋgoc bumaŋkonec baefucnumeŋ; irec go jaha muteŋguhuc juekopac.

⁷Ŋic bocjahazi nore manapie sowi tinac eekac; ehame goki ine paŋnea sabecnuekic.

⁸Gore mumuteŋzi micnaneo fusucmaekac, ʒoaŋ ʒora muafecguhuc juekopac.

⁹No ŋicqizec ehape mi mac suŋgiŋnuzemec, tâpiri‐nane betaŋkeme mi behecnuzemec.

¹⁰Râsifâc‐nane jaŋe nore dâŋ muŋgopeŋ, hâmopemurâ ejarekac jaŋe muc manac eŋgopieŋ.

¹¹Ehuc muŋgopieŋ, “Anutuzi e behewec, jâpe raku hâponiŋ me, moczi moc mi ŋezickeocmu.”

¹²O Anutu, go taicko mi junarec, Anutu‐nane, go fâro barâ ware baficnuc.

¹³Qoricnueŋgopieŋ jaŋe mimierâ omaenʒepieŋ; no sisipiric fua‐nareocte mueŋgopieŋ, jaŋere faio mimi qaqa â nifepupu fezejec.

¹⁴No ine ʒuʒuhuc woricguhuc jupemu, â ʒâŋe biŋege basawehuc jaha jupemu.

¹⁵Micnanezi eebapage tiŋne irec binaŋ bazejec, dameŋ sâc bâbâpiaŋ giege musokazejec; irec ʒarezi mamana‐nane sirickekac.

¹⁶Wofuŋ Anutu gore tâpirire biŋe bâroŋ bafisipemu; gore tiŋne gie sawa muafeckepemu.

¹⁷O Anutu, go ɋie‐naneonecteaŋ wiac qazu‐narehuc jumeŋ, eme no mâsi bapage mutaniŋkehuc jaha juekopac.

¹⁸Irec no ŋicraŋɋa epe jaŋɋâŋ âkecnume, Anutu, go sifu mi behecnuzemec. Eme no ŋic gaŋne gaŋne fua raniŋmu, jaŋe tâpirige mutaniŋke‐jarezepac.

¹⁹Anutu go tiŋnegezi feku sambâŋ heuakac. Goki wiac kâcɋene sâko eekic; mozi Anutu gore sâc jukac?

²⁰Go manahaŋ ʒârâ hâriŋ bocjaha bâfuac‐nâpowec; eme ʒi mocwâc bâfiriec‐nâpocmu, â mâreŋ hukicnaonec mocwâc baefuc‐nâpocmu.

²¹Erâ nore ʒâŋe wâc bafaharecmu, â bâbâmiriŋ bâfua‐narecmu.

²²O Anutu‐nane, no iŋuc jaha kâriŋɋaŋ qahuc jauŋ fârigere mumbiaŋgupemu. No gita qahuc muteŋ bâteŋ egarepemu, Israere Tiri rune go.

²³Micbipic‐nanezi go muteŋguhuc ʒeri ezepac, â maŋ qâqâtâc‐nane firuemeŋte e iŋuc jaha ezejec.

²⁴Â nameŋ‐nanezi dameŋ sâc tiŋnege mutaniŋkezejec. No sipiricnuzo mumbiŋ jaŋe bawahac‐jopatec mimi fai‐jeŋicko fewec.