Kölfel 71:3-24

³En kopwe ai lenien op usun eu föimw, ia üa tongeni op ie fansoun meinisin. En ewe mi pwon ngeniei pwe kopwe amanauaei, pun en ai achau me ai imwen maun.

⁴Ai Kot, kopwe angasaei seni ekewe aramasangau, pwal seni ekewe mwän mi ngau o mwäneson.

⁵Ai Samol mi Lapalap, en ai apilükülük, üa lükülükuk seni lesäräföi.

⁶Lon unusen manauei üa unnenuk, en ewe mi tümwünüei seni ai uputiu. Üpwe chök mwareituk fansoun meinisin.

⁷Üa usun chök eu asisil mi eniwokus ngeni chomong aramas, nge en ai lenien op mi pöchökül.

⁸Üa mwareituk iteiten rän o pwärätä om ling.

⁹Kosap pöütieila iei lon ai chinlap, nge kosap likitieila iei, lupwen üa apwangapwang.

¹⁰Pun chon oputaei ra kapas usi, ra rawangauaei o mochen nieila.

¹¹Ra apasa, “Kot a likitala ätei. Ousipwe tapweri o turufi, pun esap wor eman epwe angasa i.”

¹²Ai Kot, kosap toau seniei. Ai Kot, kopwe kaito pwe kopwe alisiei.

¹³Amwo ekewe chon atipisiei repwe säw o rosola. Nge chokewe mi kütta ar repwe afeiengauaei repwe küna turunufas me itengau.

¹⁴Nge ngang üpwe apilükülükuk fansoun meinisin o alapala ai mwareituk.

¹⁵Iteiten rän üpwe apworausa usun om föför mi pwüng, pwal usun om amanauaei, inamwo ika üsap tongeni weweiti meinisin.

¹⁶Ai Kot, Samol mi Lapalap, üpwe feito o apworausafeili om kewe föför mi manaman, üpwe mwareiti om pwüng echök.

¹⁷Ai Kot, ka aiöüei seni lesäräföi, nge ngang üa chüen asilefeili om föför mi amwarar.

¹⁸Ai Kot, kosap likitieila iei, lupwen üa chinlap o pwech mökürei. Kopwe etiei, lupwen üpwe asilefeili om manaman me om tufich ngeni ekewe täppin aramas repwe up me mürin.

¹⁹Ai Kot, om pwüng a tori ekewe läng mi tekia. En ka föri mettoch mi amwarar. Ai Kot, iö a wewe ngonuk?

²⁰En ewe mi öküna ngeniei chomong weires me riaföü, kopwe pwal apöchökülasefäliei, kopwe uweesefälieitä seni epin fanüfan.

²¹En kopwe alapala ai iteüöch o achipasefäliei.

²²Ai Kot, ngang üpwe fokun mwareituk ren kitar, pokiten om allükülük, üpwe kölün mwareituk ren ükülele, en Ewe mi Pin me lon Israel.

²³Üpwe mweir fän pwapwa, lupwen üpwe kölün mwareituk. Üpwe mwareituk, pun ka amanauaei.

²⁴Iteiten rän üpwe kapas usun om pwüng, pun chokewe mi kütta ar repwe afeiengauaei ra säw o itengau.