SALMOS 71:3-24

³Nako' ka to yej x̱e gan soa' chawe', na' wak yida' gan zo' Le' dot ža, na' yele. Bseḻa' no benne' yeslé' neda', dan' nako' Le' ka to yej x̱e gan zoa' choch.

⁴X̱ana' Dios, beslá neda' ḻo na'gak benne' ka' bebéj yíchjgake' Le', na' ḻo na'gak benne' ka' žóngake' da' ẕinnj, na' zej nake' yichj ža'a.

⁵Žx̱en ḻaža'a Le', X̱ana' Dios. Le' ẕwíakzo' neda' kate' ne naktia' bí'do'te.

⁶Le' ba nox̱kzo' neda' katen' za' golja'. Le' beno' ga bžoja' ḻo ḻe'e x̱na'a. Wká'n ẕénteza' Le'.

⁷Bebángekle benne' zanḻe'e kan gok chia', san Le' ẕwíakzo' binlo neda'.

⁸Ben ga góḻteza' da' we ḻawa' Le', na' wká'n ẕena' Le' dot ža.

⁹Bi wzó' neda' cheḻa'ale kate' ba ngola'. Kate' yedó ḻaža'a, bi kwej yichjo' neda'.

¹⁰Benne' ka' ẕžá'agake' neda' ẕnnégake' chia', na' benne' ka' žak ḻáže'gake' gótgake' neda' ba béngake' toze diža'.

¹¹Ẕnnágake': “Bzoa Dios ḻe' cheḻa'ale. Le cho'o chejx̱enžo-ne' dan' bi zoa no benne' yeslé' ḻe'.”

¹²Dios, bi so' zi'to' ga zoa' ni. Dios chia', da ka' gaze gákḻeno' neda'.

¹³Ben ga yedoé'egekle, na' nítgekle benne' ka' ẕdíḻ-ḻengake' neda'. Ben ga soagak ḻo yeḻa' sto', na' chíx̱gekle benne' ka' žak ḻáže'gake' góngake' chia' da' ẕinnj,

¹⁴san neda' wx̱én ḻáže'teza' Le', na' we ḻáwteza' Le'.

¹⁵Wzenla' benne' ka' nako' chawe', na' wzéntezela' ḻégake' kan besló' neda', ḻa'kze bi nnezla' baḻ chi'i besló' neda'.

¹⁶Wchaḻjkza' che da' ẕenḻe'e da' beno' Le', X̱ana' Dios, na' wsá'a ḻáže'gak benne' ka' kan nakkzo' chawe'.

¹⁷Dios, Le' bsedlo' neda' kate' ne naktia' bí'do'te. Ẕḻoe'ela' benne' ka' ka nak da' ẕenḻe'e da' beno'.

¹⁸Bi kwej yichjo' neda' kate' ba ngola', na' ba bgocha', san be' neda' latje wzenla' ẕa'sóa' ka' ka nak yeḻa' wak chio', na' wzenla' bi'do' ka' bi na' gáljgakbe' ka nak chio',

¹⁹na' da' chawe' da' nako', da' naken ẕenḻe'e, Dios. Le' beno' da' ka' zej nakḻe'en ẕen. Dios, ¿noẕkze benne' nake' ka nako' Le'?

²⁰Le' beno' ga wdía' ḻo da' zan da' zede, na' ḻo da' ka' bi žakgak chawe', na' gono' ga yebana' neda', na' yechiso' neda' ḻo yežw ba.

²¹Gono' ga gakža' ẕen, na' yeyón ẕeno' neda'.

²²Neda' we ḻawkza' Le', na' chinna' da' žóḻ-ḻento'. X̱ana' Dios, goḻkza' che da' likze chio' na' chinna' da' ka'. Nako' Benne' La'y chegak benne' Israel ka'.

²³Soa' ḻo yeḻa' ba nez kate' goḻkza' chio' Le', na' yebekzle be' da' nakkza' dan' beya'wo'.

²⁴Wcháḻjteza' che da' chawe' da' nako' dot ža, na' yele, dan' beno' ga bedoé'egekle, na' bchíx̱gekle benne' ka' ben byéngake' góngake' neda' ẕia.