Miti Mânec 68:2-19

²Hosâczi tâtieekac iŋuc bâtâtiec‐jopaekac, wokemaŋ ʒocko ʒâseŋkeekac irec sâc, sindaŋŋic jaŋe Anuture maio siroweeŋgopieŋ.

³Tiŋne jaŋe ine Anuture maio aŋac â bubiaŋ manaeŋgopieŋ, â ʒeri bari ehuc kiwaeeŋgopieŋ.

⁴Anutu gae hecneniŋ, ʒâŋe‐ticne muafeckeniŋ, karorac faio juekac e gae moc hefuacneniŋ, ʒâŋe‐ticne Wofuŋ, mai‐ticnao kiwaeniŋ.

⁵Anutu e tiri hae‐ticnao bekâ mamac ejareekac, â hozec roroŋ sasabec ejareekac.

⁶Anutuzi qarâ suriŋne fic hae bâfua‐jareekac, niŋgiŋ‐jopakicne firuec‐jopame juhâmoeŋgopieŋ; maŋrâŋgeŋ jaŋe ine mâreŋ hahaŋkekicnao juniŋmu.

⁷O Anutu, go ŋicfâcge bânie‐jarehuc, mâreŋ tuhuo âte âte rameŋ,

⁸dameŋ ira mâreŋ ɋiɋiteckewec â sambâŋkonec hoe wahawec, Anutu gore maio. Sinai hâcne Anutu gore maio ɋiɋiteckewec, Israere Anutu gore maio.

⁹Anutu, go hoe micsâko hesietec wahawec, fuŋfuŋfâcge betaŋkepie sâc bâgunuc‐jopameŋ.

¹⁰Lama gurufâcge jaŋe ira ŋeŋe hae bâfuambiŋ, Anutu, buurucgere hapetac hone maiŋ ejaremeŋ.

¹¹Wofuŋzi bubiaŋ biŋedâŋ mufuawec; ŋokac hâmbâŋ sâkozi kiŋaŋ rahuc dâŋ bârâwiŋkembiŋ:

¹²“Ŋicwofuŋ jaŋe momorifâc‐jeŋic jaŋehec wiseŋgopieŋ.” Ŋokac haeo ŋeŋenezi mafa mateŋ kâdoc qaŋgopieŋ.

¹³Jaŋe hapâ fakecne siliwazi ɋorockekicne iŋucne, â mâmâŋ‐jeŋic i gol sâsârekicne ârâŋ ɋâri irec sâc. Ehame wemocte lama sapaoa ŋezo muŋgopieŋ?

¹⁴Bapafârezi ŋicwofuŋ qâtâtiec‐jopawecko, Zalimoŋ tikio sinou wahawec.

¹⁵O tiki sâko mako, Basaŋ tiki, o tiki qoŋne qoŋne, Basaŋ tiki!

¹⁶Tiki qoŋne qoŋne go wemocte Anuture tiki iiŋguuŋ ecnekomec? Tiki ira hâcne Wofuŋzi jusanaŋkeocte bâwosâewec.

¹⁷Anuture ʒika keretac tauseŋne tauseŋne bocjaha, irec faio Wofuŋzi Sinai beherâ tirificko fisiwec.

¹⁸Go faic hefâmeŋ, niŋgiŋ‐jopakicne jowac‐jopameŋ; ŋic jaŋere guruo taha fua‐garewec, râŋgeŋne jaŋerao mâmâc; ine go ira Wofuŋ Anutu jucmurâ iŋuc emeŋ.

¹⁹Wofuŋ muteŋkezo, e ʒoaŋ sâc de âsic enâreekac, Anutu e bâbâpiaŋ‐nâŋec.