Miti Mânec 41:1-7

¹Hapetac hone maiŋ ejareekac ŋic ere manape ʒerine ekac; dameŋ sâqocnao Wofuŋzi e ŋezickeocmu.

²Wofuŋzi e hone soŋaŋ ecneme jufehuc juocmu, eme mâreŋ irec ŋic jaŋe mu ʒeri ecneniŋmu; â râsifâcne jaŋe wiac moc ecnezo mupie mi qikiŋne‐jareocmu.

³Huc fohame Wofuŋzi dope hutuŋ ecneocmu, â ʒâic wiac‐ticne bâmâteŋkecne‐fâreocmu.

⁴No ine mupo, “Wofuŋ go aki anonoc enarec; bâpiaŋnuc, no sâqocne bahuc bugao bapo hâcne.”

⁵Râsifâc‐nane jaŋe qaisocnuhuc ʒiŋuc muŋgopieŋ: “E wezimucko hâmome ʒâŋe‐ticne omaeocmu?”

⁶Moc e iqicnuocte fisiekac e eatuc dâŋ muekac, ehuc maŋnezi wiac repicne mana biric eekac; izi hae ʒoŋao hurâ muiŋ musawec eekac.

⁷Qaisocnueŋgopieŋ sasawa jaŋe saŋucko dâŋ muc manac eeŋgopieŋ; wiac gâgâpâcne fua‐nareocte mamanasu gie baeŋgopieŋ.