SALMOS 41:1-7

¹Paqui nopa tlacatl tlen mocuesohua pampa quinicnelía tlen teicneltzitzi, pampa TOTECO quipalehuis quema hualas tlaohuijcayotl.

²TOTECO quimocuitlahuis para axaca quimictis. Huan TOTECO quitiochihuas tlamiyacapa ipan tlali Israel. Yajaya ax quicajtehuas, niyon ax quicahuas ininmaco icualancaitacahua para ma quichihuilica tlen quinequise.

³Quema huetztos ipan tlaijiyohuilistli, TOTECO quitlalanas ipan itlapech huan quiijcuenilis nopa cocolistli.

⁴Na niquilhui TOTECO: “TOTECO, na nitlajtlacolchijtoc moca ta. Xinechtlasojtla huan xinechchicahua.”

⁵Nocualancaitacahua quinequij ma nechajsi tlen fiero. Noca camatij huan quinequij ma nimiqui huan ayoc aca ma nechilnamiquis.

⁶Quema nechpaxalohuaj, mochihuaj queja nohuampoyohua, pero ax nelía tlen quiijtohuaj. Quema itztoque nohuaya san quitlacaquilíaj tlachque onca para huelis quipatlase ica tlen más fiero, huan teipa quisase huan teyolmelajtinemise tlen na.

⁷Quena, nocualancaitacahua mosentilíaj huan noca camatij. Tepohuilíaj para ayoc onca pajtli para na huan nimantzi nimiquis.