Miti Mânec 16:3-11

³Â mâreŋ ʒira mitiŋic juŋgopieŋ jaŋere mukopac, jaŋe furi sâkofâc‐nane, jaŋerao aŋac‐nane fokac.

⁴Nemu mocte wowosâe jaŋe maŋʒârâ bocjaha fua‐jareekac. No soczi taha bapa gie‐jeŋicte takicnukac, â nemu ʒâŋe‐jeŋic mu bâuac mi epemu.

⁵Hesarac mâreŋ â nânâ kâdoc‐nane i Wofuŋzi ekac, go hâcne mâreŋ biŋe‐nane basanaŋkekic.

⁶Gaŋrukec mâreŋ biaŋnao râe‐narekicne, merâfâc‐nane honepe aŋacne ekac.

⁷Wofuŋ, dâŋ mu henunuc enareekac, e muafeckekopac, ŋafeo buhândâŋ‐nanezi wâc mu qâmoc enareekac.

⁸No Wofuŋ maŋzi fârepe mai‐naneo domahuc juekac, e fâre‐naneo domaha biric boroc mi epemu.

⁹Irec bunane biaŋkeme maŋzi mu ʒeri ekopac, erâ sahac‐nanezi wâc sâcne ŋec foc eocmu.

¹⁰Go qaisocnutec hâmoc haeo mi ʒâziŋkepemu, â tiriŋicge behetec gârecke ʒaŋ mi eocmu.

¹¹Go jujure hata nowatuekomec; go hâcne juekicko bubiaŋ guru fufusuc fokac, mefâregao aŋac bajukic i mi tatarane.