Melkahka Kan 9:2-19

²I pahn kokoulki koulen peren pwehki komwi. I pahn koulki koulen kaping ong komwi, Koht Wasa Lapalap.

³Ei imwintihti kan kin tangdoaui ni omwi kin ketido; re kin pwupwudi oh mehla.

⁴Komw me kin ketin mehlel oh pwung ni omwi kadeik kan, komw ketin kadeikadahr ei pwung.

⁵Komw ketin kalokeier me rotorot akan oh ketin kamwomwalahr aramas suwed kan; solahr me pahn taman irail.

⁶At imwintihti kan sohralahr; komwi me ketin kamwomwala ar kahnimw kan, solahr me taman irail douluhl.

⁷Ahpw KAUN-O iei nanmwarki poatopoat; e ketin koasoanedier sapwellime mwoalen kopwung.

⁸E ketin kakaun sampah ni pwung; e kin ketin kapwung wehi kan ni kadeik pwung.

⁹Rehn KAUN-O iei wasahn ruk ong me toutoulahr akan, iei wasahn rukula ni ahnsou apwal.

¹⁰Maing KAUN, irail kan me patohwan esei komwi pahn kin likih komwi; komw sohte kin ketin likidmeliehla mehmen me kin patohdo rehmwi.

¹¹Kumwail koulki koulen kaping ong KAUN-O, me kin kakaun Saion! Kumwail lohkihong wehi koaros dahme e ketin wiadahr!

¹²Koht kin ketin tamataman irail kan me kin lokolok; e sohte kin meliehla ngilen ar likwer, oh kin ketin kaloke me kin wia sapwung ong irail.

¹³Maing KAUN, komw ketin kupwurkalahngan ong ie! Komw mahsanih kalokolok kan me ei imwintihti kan kin wiahiong ie! Maing KAUN, komw ketin kapitiesang mehla,

¹⁴pwe I en kak uh mwohn mehn Serusalem kan oh koasoia mehkoaros me I kin kapikapingahki komwi. I pahn pereperen pwehki omwi ketin kapitiehla.

¹⁵Aramas rotorot kan weiradahr pwoahr ehu oh re pwupwudiong loale; re pein lohdiong nan ar lidip.

¹⁶KAUN-O ketin kasalehda pein ih sang ni sapwellime kadeik pwung kan, oh aramas suwed kan lohdier nan pein ar wiewia kan.

¹⁷Mehla iei imwilahn aramas suwed kan koaros, pil imwilahn irail koaros me kin soikala Koht.

¹⁸Me semwehmwe kan sohte pahn kin lekdekla ahnsou koaros; arail koapworopwor sohte pahn ohla kohkohlahte.

¹⁹Maing KAUN, komw ketidohla; komw dehr ketin mweidohng aramas akan en uhwong komwi! Komw ketikihda me rotorot kan mwohn silangmwi oh ketin kadeikirailda.