Buk Song 9:2-19

²Mi tingting long yu na mi singim song bilong amamas. God Antap Tru, bai mi singim song bilong litimapim biknem bilong yu.

³Ol birua bilong mi i lukim yu na ol i ranawe i go. Ol i pundaun na i dai olgeta.

⁴Yu sindaun long sia olsem jas na yu mekim stretpela kot. Yu skelim pasin bilong mi na mi winim kot.

⁵Yu bin kotim ol haiden. Yu bagarapim pinis ol man nogut, na oltaim oltaim bai i no gat man i tingting moa long ol.

⁶Ol birua i bagarap pinis na bai ol i stap olsem inap oltaim. God, yu bagarapim pinis ol taun bilong ol, na i no gat man bai i tingim ol gen.

⁷Tasol Bikpela i stap king inap oltaim. Em i redi pinis long mekim kot.

⁸Em i bosim olgeta lain manmeri na ol lo bilong en i stretpela tru. Na long stretpela pasin bilong en em bai i skelim pasin bilong olgeta lain manmeri.

⁹Bikpela i stap olsem wanpela strongpela haus. Ol man i kisim hevi long ol birua, ol i ken i go i stap long en. Long taim bilong hevi ol i ken i go long em na hait.

¹⁰Bikpela, yu no save givim baksait long ol manmeri i kam long yu. Olsem na ol man i save long yu bai ol i bilip tru long yu.

¹¹Bikpela i stap king long taun Saion. Singim song long em na litimapim nem bilong em. Tokaut long olgeta lain pipel long ol bikpela wok em i bin mekim.

¹²Bikpela i save tingting long ol man i karim pen. Na em i no save pasim yau bilong en long krai bilong ol. Em i save bekim pe nogut long ol man i mekim nogut long ol.

¹³God, yu ken marimari long mi. Lukim pen na hevi ol birua i givim mi. Yu save kisim bek mi long taim klostu mi laik i dai, na yu mekim mi i stap gut.

¹⁴Olsem na mi ken stori long olgeta samting yu bin mekim na mi ken litimapim nem bilong yu. Mi ken sanap long dua bilong taun Saion na mi ken tokaut na amamas long yu bin kisim bek mi.

¹⁵Ol haiden i wokim hul long graun bilong holimpas mipela. Tasol ol yet i pundaun long en. Ol i taitim umben bilong holimpas mipela, tasol umben i pasim ol yet.

¹⁶God i soim pasin bilong em long ol man long taim em i mekim kot. Ol man nogut i bin mekim ol samting bilong bagarapim ol arapela man, tasol dispela ol samting i tanim na i bagarapim ol yet.

¹⁷Ol man nogut na ol lain manmeri i save givim baksait long God, olgeta i mas i go i stap long ples bilong ol man i dai pinis.

¹⁸Oltaim God i no save lusim tingting long ol rabisman. Ol man i gat bikpela hevi ol i save bilip long God na wetim em i helpim ol. Na em bai i no inap larim ol i wet nating.

¹⁹God, yu kam. Yu no ken larim ol man bilong graun i luk pes long yu. Yu mas mekim ol haiden i sanap long kot bilong yu na yu skelim pasin bilong ol.