Melkahka Kan 94:5-22

⁵Maing KAUN, re kin kauwehla sapwellimomwi aramas akan; re kin katoutouwihala irail kan me kisehn sapwellimomwi.

⁶Re kin kemehla liohdi kan oh me sepwoupwou kan, oh kin kihsang mour en mehn liki kan me kin kousoan nan at wehi.

⁷Re kin kahski dene, “KAUN-O sohte kin mahsanih kiht; Koht en Israel sohte kin ketin tehk wasa.”

⁸Kumwail nei aramas akan, ia duwe, kumwail meid loalopwon oh pweipwei? Iahd kumwail pahn loalokongla?

⁹Koht me ketikihong kitail salengatail kan—e ahpw sohte kak ketin karonge wasa? Ih me ketikihong kitail masatail kan—e ahpw sohte kak mahsanih wasa?

¹⁰Ih me kin ketin angiangih wehi kan—eri dah, e sohte pahn ketin kaloke irail? Ih me kin wia sounpadahk en aramas koaros—eri dah, e sohte ketin kupwurokong?

¹¹KAUN-O ketin mwahngih dahme aramas akan kin medemedewe; e kin mwahngih duwen mwahl en audepen nan kapehdirail kan.

¹²Maing KAUN, ia uwen peren en aramas me komw kin ketin kaweid, me komw kin ketin padahkihong sapwellimomwi kosonned!

¹³Komw kin ketin kommoalehdi sang nan eh apwal lao pwoahr loal kin weiweida mehn lidipiedi aramas suwed.

¹⁴KAUN-O sohte pahn ketin kesehla sapwellime kan; e sohte pahn ketin kesehla irail kan me kisehn sapwellime.

¹⁵Pwuhng pahn pwurehng dierekda nan mwoalen kopwung kan, oh aramas pwung koaros pahn utung.

¹⁶Ihs me uhda oh uhpalikin ie rehn aramas suwed kan? Ihs me iang ie uhwong irail kan me kin wiahda me suwed?

¹⁷Ma KAUN-O sohte ketin seweseiehda, I uhdahn mwadangdilangehr rehn me melahr akan.

¹⁸I patohwan, “I pwupwudier”; ahpw Maing KAUN, sapwellimomwi limpoak poatopoat me koliehda.

¹⁹Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.

²⁰Komw sohte kin ketin kupwurki sounkopwung mwersuwed kan, me kin kamanahla kosonned sapahrek,

²¹me kin wiahda koasoandi me uhwong aramas mwahu oh kin pangalahng mehla aramas akan me sohte diparail.

²²Ahpw KAUN-O kin ketin doare ie; ei Koht kin ketin sinsile ie.