Melkahka Kan 94:2-11

²Komwi me sounkopwung en aramas koaros; komw ketida oh ketikihong me aklapalap akan dahme konehng irail!

³Ia erein aramas suwed kan ar pahn nsensenamwahu? Maing KAUN, ia erein?

⁴Ia erein me dipan kan ar pahn akalapalap oh akahksuweiki ar tiahk suwed kan?

⁵Maing KAUN, re kin kauwehla sapwellimomwi aramas akan; re kin katoutouwihala irail kan me kisehn sapwellimomwi.

⁶Re kin kemehla liohdi kan oh me sepwoupwou kan, oh kin kihsang mour en mehn liki kan me kin kousoan nan at wehi.

⁷Re kin kahski dene, “KAUN-O sohte kin mahsanih kiht; Koht en Israel sohte kin ketin tehk wasa.”

⁸Kumwail nei aramas akan, ia duwe, kumwail meid loalopwon oh pweipwei? Iahd kumwail pahn loalokongla?

⁹Koht me ketikihong kitail salengatail kan—e ahpw sohte kak ketin karonge wasa? Ih me ketikihong kitail masatail kan—e ahpw sohte kak mahsanih wasa?

¹⁰Ih me kin ketin angiangih wehi kan—eri dah, e sohte pahn ketin kaloke irail? Ih me kin wia sounpadahk en aramas koaros—eri dah, e sohte ketin kupwurokong?

¹¹KAUN-O ketin mwahngih dahme aramas akan kin medemedewe; e kin mwahngih duwen mwahl en audepen nan kapehdirail kan.