Melkahka Kan 65:1-5

¹Maing Koht, me pwung at pahn kapinga komwi nan Saion oh kapwaiada at inou ong komwi,

²pwehki omwi kin ketin sapeng pekipek kan. Aramas koaros pahn pwarowei rehmwi

³pwehki diparail kan. Dipat kin kaloweikitedi, komwi ahpw kin ketin mahkikihong kiht.

⁴Meid pai irail kan me komwi ketin pilada, me komwi ketikiniraildo pwe re en kin kousoan nan mwoalomwi sarawi. Se pahn nsenamwahukihla soahng mwahu kan en nan tehnpasomwi sarawi, kapai kan en Tehnpasomwi Sarawio.

⁵Komw kin ketin sapeng kiht ni omwi mweidohng at pahn powehdi, oh komw kin ketin komour kin kiht sapwellimomwi wiewia kapwuriamwei kan. Tohn wehi koaros nin sampah kin likih komwi, pil tohn deke doh en nan madau kan.