Melkahka Kan 52:2-9

²Ke kin koasoanehdi ke en kauwehla meteikan; lowomwen rasehng reise keng pwoat. Ahnsou koaros ke kin kinehda likamw.

³Ke kin kesempwalki tiahk suwed laud sang tiahk mwahu oh likamw laud sang mehlel.

⁴Aramas likamw emen kowe! Ke kin mwahuki kauwehki meteikan omw lokaia kan.

⁵Eri Koht pahn ketin kauweiukala kohkohlahte; e pahn ketin kasapwiluhkedi oh adihasang uhk wasa ke kin kousoan ie; e pahn ketikihsang uhk nan sapwen me momour kan.

⁶Aramas pwung kan pahn kilang met oh masakada; irail eri pahn kouruhrkin uhk oh nda,

⁷“Kumwail kilang, iet aramas emen me sohte kin koapworopworki sawas en Koht, ahpw e kin koapworopworki kiden eh kepwe oh kin repen mourki tiahk suwed oh likamw.”

⁸A ngehi, I rasehng tuhke en olip pwoat me kin kekeirda nan tehnpas en Koht; I kin likih sapwellime limpoak poatopoat kohkohlahte.

⁹Maing Koht, I pahn kin patohwan kapingkalahnganki ong komwi ahnsou koaros ni mehkoaros me komw ketin wiadahr; I pahn patohwan lohki mwohn sapwellimomwi aramas akan duwen omwi kupwur mwahu.