Melkahka Kan 145:3-19

³KAUN-O me roson kowalahpie, me pwung en ketin ale kaping koaros; sohte me kak dehdehki duwen sapwellime roson lapalap.

⁴Dih kan koaros pahn kin kapinga wiepen nin limomwi kan; re pahn kin lohkiseli duwen wiepen nin limomwi manaman akan.

⁵Aramas akan pahn kin koasoia duwen sapwelliomwi lingan oh roson, oh I pahn kin medemedewe duwen omwi wiewia kapwuriamwei kan.

⁶Aramas akan pahn kin koasoia duwen wiepen nin limomwi manaman akan, oh I pahn kin lohkiseli duwen sapwellimomwi roson lapalap.

⁷Re pahn kin koasoia duwen wiewia mwahu en nin limomwi kan koaros oh koulki duwen sapwellimomwi kadek.

⁸KAUN-O me ketin limpoak oh kalahngan, e kin ketin kanengamah oh diren limpoak poatopoat.

⁹E kin kupwur mwahu ong aramas akan koaros oh kin ketin kalahngan ong wiepen nin lime kan koaros.

¹⁰Maing KAUN, wiepen nin limomwi kan koaros pahn kapinga komwi, oh sapwellimomwi aramas akan pahn kasapahlkalahngan ong komwi.

¹¹Re pahn koasoia duwen lingan en sapwellimomwi wehi, oh pil duwen sapwellimomwi manaman,

¹²Pwe aramas koaros en dehdehkihla duwen wiepen nin limomwi manaman akan oh pil duwen roson lingan en sapwellimomwi wehi.

¹³Sapwellimomwi wehi, iei wehi soutuk ehu, komwi me nanmwarki kohkohlahte. KAUN-O me ketin loalopwoat ni sapwellime inou kan; oh me kin kalahngan ni wiepen nin lime kan koaros.

¹⁴E kin ketin sewese irail kan me kin mihla nan apwal; e kin ketin pwekada irail kan me kin pwupwudi.

¹⁵Me momour kan koaros kin sohpeiong oh koapworopworkin komwi, oh komwi kin ketin katungoale irail nin duwen ar anahn akan.

¹⁶Komwi kin ketikihong irail uwen me itar oh kin ketin kaitarala ar anahn akan koaros.

¹⁷KAUN-O me ketin pwung ni mehkoaros me e kin ketin wia, oh kalahngan ni wiepen nin lime kan koaros.

¹⁸E kin ketiket limwahn irail kan me kin likweriong, irail akan me kin likweriong ni mehlel.

¹⁹E kin ketikihong anahn en irail me kin wauneki; e kin ketin karonge ar likwer, oh kin ketin komourirailla.