Sam 145:3-19

³(Gimel) Nomana lavata se Zihova, meke garona tugo pude tava lavata va ululae, meke sa Nana linavata si lopu boka ta gilana beto.

⁴(Dalet) Madi tozi vari tetei nia rina sinage na sage sari na Mua tinavete, meke kaqu tozi vura ni rini sari na Mua tinavete marilaedi.

⁵(He) Kaqu tozi vura nia rini sa Mua tinolava variva magasana, meke arau kaqu balabala va lohi sari na Mua tinavete marilaedi.

⁶(Vav) Sari na tinoni si kaqu tozi vura ni sari na Mua tinavete ṉiṉiradi, meke arau si kaqu tozi vura nia sa Mua linavata.

⁷(Zain) Kaqu zama vura ni rini sari doduru Mua lineana, meke kera vura nia sa Mua tataru vatukana.

⁸(Het) Tataru na variva taleosae se Zihova, lopu tuturei bugoro si Asa, meke nomana sa Nana tataru nabuna.

⁹(Tet) Leana se Zihova koari doduru tie, meke sa Nana tataru ṉoṉona si la koari doduru Nana vina podaka.

¹⁰(Yod) Kei Zihova, sari doduru Mua vina podaka toadi si kaqu vahesigo si Agoi, meke sari doduru mua tie toṉoto si zama leana koa Goi.

¹¹(Kaph) Kaqu tozi vura nia rini sa vina lavatana sa Mua Binaṉara, meke kaqu tozi vura nia rini sa Mua ṉiniraṉira,

¹²(Lamed) pude doduru tie si madi gilani sari na Mua tinavete ṉiṉiradi, meke sari na rinavutuna gua sa Mua Binaṉara.

¹³(Mem) Koa hola ninae rane sa Mua tinolitolie, meke koa Baṉara si Goi ninae rane. (Nun) Zihova si kopu ni sari doduru Nana zinama, meke tataru koari doduru Nana tinavete.

¹⁴(Samek) Toka ni Sa sarini pu koa pa tinasuna, ovulu sage ni Sa saripu hoqa.

¹⁵(Ain) Sari doduru tiṉitoṉa toadi si doṉo atu mo koa Goi, pude poni ni Goi sari na gedi ginani pa dia totoso garodi.

¹⁶(Pe) Pada saripu gua poni Goi koa rini, meke va garogaroi Goi sari na dia inokoro ri doduru.

¹⁷(Zade) Toṉoto se Zihova koari doduru Nana siraṉa, meke tataru na vatukana koari doduru Nana tinavete.

¹⁸(Qoph) Koa tata si Asa koarini pu tepa la koa Sa, sarini pu tepa va hinokara la koa Sa.

¹⁹(Resh) Poni Sa gua sapu ta hivae koarini pu va lavatia si Asa. Avosi Sa sari na dia kinabo, meke harupi Sa sarini.