Text copied!
CopyCompare
Fúka Moodaanaki Kira Ufa Afaqínaasa Ufa - Mataioo

Mataioo 19

Help us?
Click on verse(s) to share them!
1Yísufa maa-ufáusa taikáseenoo Kariree máqa máaqa minníseenoo Yudeea máqa máaqai óoqu finoo Yooradanna námmari dínni afainni márinau.
2Miqóo óonu márufaqa faiqí ánaasee moómoo áfaqee óonu roofanoo misá aurírana taikánnisanau.
3Farisai ámaana ufa qímarusa misá miqóo aniréeqa Yísuna ueeqásee amanammásee qáfararee qímasee qímamiqa qiqau. Amanée faiqí fannoo óosana óosana ainainara qímaseenoo narí ánaaqa minnísaannoo fee, Mooseena sándufa rukíaseenoo fee miqíannoo fee.
4Yísufa iriséenoo qinau. Sía fee ínnee Mooseena ákara ásaanaridee. Óosana árooqooqari Ánutufa óosana araséenoo misá áuqinau. Faiqí faqa ánaasee faqa óosanaraseenoo áuqinau. Sía fee ínnee mi-akaránara íridee.
5Ánutufa minára maaqí qinau, qinée óosana árooqooqari faiqi faqa ánaasee faqa áuquafannanara faiqí narí ánoona ákoona minnísee narí ánaaqa faqa moodáanakikíannoo. Miqóo náriqa miqandá moodáa márifaranoo.
6Yísufa minára kaifáa qímanniminau. Miqandá sía qaaraqánda márifaqa moodáa amaqiara foora márifaranoo. Ánutufa moodáanaki áquminafa sía uqanna faiqí idukúaqa.
7Farisai ámaana ufa qímariasa miná iriséeqa qiqau. Mooseefa sándufa ákara rúma quqáqoofa márida. Minnísara papiqa ákara rúmeeqee ánaasee amisée aqiqáa̱. Mooseefa miqí qímaqaifana Yísu anée náqi fee qídanee.
8Yísufa iriséenoo qinau. Ínni írirana mandáikinara ínni nímuqusa sía amaqí márifa afeekaíkinoo ámatooki márinara minára kai Mooseefa ákooqee márufanoo ínneeqa nínaaqara minnísaaqee qinau. Indaarú kúradoo aukuana sía miqínoo márinau. Miqóo Ánutufa miqandára apíqa máriaqee qinau.
9Qinée qímannimidaqa, faiqí yáfee narí ánaaqa sía úmmuarimari anaaseena andeeqára ánaasee káqi minníseenoo moo ánaasee márainafa, mi-fasiqáfa qúmuarammidanoo.
10Miná faiqi námu anirée qímamidaqa qiqau. Faiqí ánaasee miqíqa máridaqa amaná faiqí náriqá kai máridaqa adeedaana máriaqaana. Maasá andeeqáidee sía fee andeeqáidee.
11Yísufa misá ufa iriséenoo qímanniminau. Faiqí aiqáma máa̱ ínni ufa sía amaná máraaqeera. Ánutufa miqíannee qínausa misá kai adeedaana amaná márifara, sía aiqáma miqífaqa.
12Nífaandama itírausa misá máqookari kai nífaandama síaisa misá sía amaná ánaasee máraaqeera. Kaifáa akaqáusa nífaandama itírausa faiqí kai nífaandama itinnímaqasoosa máridaqa. Misá faqa sía amana ánaasee máraaqeera. Kaifáa ánaasee síaisa moó, misá innaarúna maqusara kai irisée náriqá kai ánaasee síaisa máridaqa. Andeeqásee márianauree qímasee Ánutunara kai irisée miqídaqa. Misá faqa sía amana ánaasee máraaqeera. Yáfee mi-sandufána amaná márinafa mifá kai máraani.
13Misá faiqí ánaasee, nári faiqi ánaaqiuqa moómoo nífiqee Yísufuqoo ániqau. Yísunara miná ásauku misásaa mundúseenoo innaaru qíanifeera nífiqee ániqau. Yísuna faiqi námu faiqí ánaasee nári faiqi ánaaqi faráfara qíaafoo qímasee niqiqámasoofanoo Yísufa qinau. Sáifaqa máree ániaqa. Sía rafáaqafunnisaaqa. Innaarúna máqusa miqírausaindi máridanoo.
15Miqí qímaseenoo narí ásauku misásaa níkiaaqa mundúseenoo nifaaqóoqa qímaseenoo fíndimeeqeenoo moosáa finau.
16Faiqí moó fannoo Yísufinnai aniréenoo qímamidanoo qinau. Qufasaa rakísirafa nána ámiqira saika áuqamamaqáananoo fee Ánutufa innaarúnai náaruara márirana qímiannoo fee.
17Yísufa iriséenoo qímaminau. Anée náqaa ifanee qiníara ámiqira ainainara iráidanee. Moodáafa kai Ánutufa mifá kai ámiqirafa máridanoo. Sía moo ámiqirafa máridanoo. Anée náaruara máriranaki kéeqararee qídanee. Dóo amaná, anée Mooseena sándufa ásaana rúmasee mi-maú kai fúa.
18Miqí qímasoofanoo mi-fasiqáfa iráidanoo qinau. Nána sándufee maráanauree. Yísufa qímaminoo qinau. Ínnee sía kuqá náruaqa, sía faiqí ánaasee úmmuariaqa, sía aináina úmmuariaqa sía kóotaki moosára únna ufa qiaqa.
19Aneenná ánoona ákoona núqu uqéeraidana nímuqusa idaaqámmánnisaa. Anée aneennára ámuqusianandee kái ínana aqoónausara ámuqusiani.

20Mi-kumaaraafá iriséenoo qinau. Anée qíanandee mi-sandufáusa dóo aiqáma maraqáunausa máridaqa. Nána saika fee moó faqa qinée áuqamásaananoo fee Ánutufa náaruara márirana qímiannoo fee.
21Yísufa iriséenoo qímaminau. Anée innaarúnai átisaa kai máriananoo. Anée aiqáma máraannee qímaseenana aneenná qumíasana aiqáma mara máreenana moo átinai nimiséenana feefaurú maraséenana kudifásiqauqa nimisáinanoo aní qumíasana aní áfeesara innaarúnai máriannoo. Miqínana dóo ánia, qiní faqa fúa.
22Mi-kumaaraafá mi-ufána iriséenoo óori ákooqamáseenoo finau. Narí aináina moómoo márunara minára óonumafi iriséenoo óori ákooqamáseenoo finau.
23Mifá fífufanoo Yísufa narí faiqi námu maaqí qímasee qímanniminau. Kúqaa ufa ánoona ufa qinée qímannimidaqa. Faiqí moó fannoo aináina faqaafa innaarúna maqa maaqaki kéeqaaneera anúqinnara mammáqamminnáranoo.
24Qinée kafáa qianáura. Amanée qóosa fannoo úka áamarai kéeqaannoo fee. Sía amana fúannoo titiqíannoo. Dóo miqí kai másee aináina faqaa fasiqa innaarúna kóoqiki kéeqarara anúquannoo.
25Miná faiqi námu mi-ufána íriqa tautíqa qiqau. Aní ufa miqínoo márinanoo fee, yáfee moó fannoo amaná innaarúnnai óoru fúannoo fee sía amana fúannoo.
26Yísufa quandáfinoo misá nári níndafamásee qímanniminau. Faiqíki maa-ainainnáfa sía amaná máridanoo. Ánutufa aiqáma ainaina amaná márifa máridanoo.
27Peetooroofa iriséenoo qímaminoo qinau. Maasá qíqafa. Maasá aiqáma ainaina quqásaunausa aní faqa fídaqa. Minára Ánutufa nána ainainee maasá qímiannoo fee.
28Yísufa iriséenoo misá qímanniminau. Qinée kúqaa ánoona ufa ínni qímannimidaqa. Fúka maqa maaqa Ánutufa kásooqaqee áuqusainaqa qinée faiqí nímaaku qiní firaa kaaqa qara ufírira qáarisaa, qaarí ufíqisee minásaa óoqu mari fínaqa faiqí ánaaseesaa rakísi mária̱naqa ínnee qiní faqa fímariasa ínnee qísaukuqara taikásee qíkunni óoqu qaara marasée nári ufírira qaarisaa qiní faqa óoqu marififáranoo. Ínnee miqóoqari Isaraee máqannaa qíkunni óoqu qaara marasée óosana Yakooboona faiqi námu átikiqari kambíqarausa misá níku nísaukusaa rakísifaranoo.
29Yáfee moó fannoo qiní dúquara iriséenoo narí máaqa faqa narí ákaqaafasaauqa faqa narí ásooqmaaka faqa narí ánoona ákoona faqa narí faiqi faqa narí saqamáinaina faqa aiqáma minnísainaqa sía miná ákiaqara kai ámianaura. Fífau faqa ámianaura innaarúnai náaruara márirana faqa ámianaura.
30Moómoosa maqee úriqararausa máriasa misá innaarúnnai óoruree uréeqarausa márifaranoo. Moómoosa maqee uréeqarausa máriasa misá innaarúnai óoruree úriqararausa márifaranoo.