Matewuzhu 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Eti warakha ya peewu na mazina aya a amarehemu a phantte ya Yinsa Al-Masiihu, peewu ya Daawuuda na Eburahiima.

²Eburahiima khunvokola Esiyaakha; Esiyaakha khunvokola Yaakhumpa; Yaakhumpa khunvokola Yuuda na attwiize;

³Yuuda khunvokola Pereezi na Zeera, mamaawe aari Tamaara; Pereezi khunvokola Hezorooni, Hezorooni khunvokola Arawu;

⁴Arawu khunvokola Aminataapi; Aminataapi khunvokola Nashooni; Nashooni khunvokola Salimooni;

⁵Salimooni khunvokola Bowaazi, mamaawe aari Rahaape; Bowaazi khunvokola Obeedi, mamaawe aari Ruuti; Obeedi khunvokola Yeese;

⁶na Yeese khunvokola mfwalume Daawuuda. Daawuuda khunvokola Seleyimaana, mamaawe aari muukha wa Uriiya;

⁷Seleyimaana khunvokola Ropowaawu; Ropowaawu khunvokola Apiiya; Apiiya khunvokola Aasa;

⁸Aasa khunvokola Zhuzaafwa; Zhuzaafwa khunvokola Joraawu; Joraawu khunvokola Uziiya;

⁹Uziiya khunvokola Jotaawu; Jotaawu khunvokola Akaaze; Akaaze khunvokola Ezakiiya;

¹⁰Ezakiiya khunvokola Manaase; Manaase khunvokola Amooni; Amooni khunvokola Joziiya;

¹¹Joziiya khunvokola Jekoniiya na attwiize, wakathi eekareliweeyo Babilooniya.

¹²Paata ya weettaniwa Babilooniya: Jekoniiya khunvokola Sheyalitiyeeli; Sheyalitiyeeli khunvokola Zorobabeeli;

¹³Zorobabeeli khunvokola Apiwuute; Apiwuute khunvokola Eliyakhiimu; Eliyakhiimu khunvokola Azoori;

¹⁴Azoori khunvokola Satookhi; Satookhi khunvokola Akiini; Akiini khunvokola Eliwuuti;

¹⁵Eliwuuti khunvokola Eliyazaari; Eliyazaari khunvokola Maata; Maata khunvokola Yaakhumpa;

¹⁶na Yaakhumpa khunvokola Yuusufu, manna wa Mariyamu, otule anvokoliyeeyo Yinsa, othuuto aniitthiwaaye Al-Masiihu.

¹⁷Khwa etthiipo waaviriye ojama khumi na nne waaza va Eburahiima mpakha Daawuuda, na khumi na nne waaza va Daawuuda mpakha va okholiwa olawaniwa Babilooniya, na khumi na nne waaza Babilooniya mpakha va ovokoliwa wa Yinsa.

¹⁸Ovokoliwa wa Yinsa Al-Masiihu pi toono. Mariyamu ari wooposiwa ti Yuusufu ahinarapalelane, khwiimittha khwa Rooho Ttakatthiifu.

¹⁹Ila Yuusufu, mposi awe, khwiiya ntthu wa shariya na woohitakhi ontwayifusha, ye khulakela sirini okayiri onrala.

²⁰Ila, paata ya wuupuwela vitthu epile, khumpuwelela nlayikha la Mbwana nkatthi wa olottha, khumuuza yoori: “Yuusufu, mwaana wa Daawuuda, ohoove ompokhera Mariyamu wiiya muukhaawo, maana ye eemittha khwa Rooho Ttakatthiifu.

²¹Ye onteela ompattha mwaana, weeyo ontthaje nzina la Yinsa, maana ye onteela owoosuru atthu awe khwa twampi zaya.”

²²Zooshi epo enteela orettikhana yoori ziretteye zooshi epile Mbwana alupiyeeyo khwa napiyu yoori:

²³“Mwaari onteela wiimittha ampatthe mwaana, anttelaaye wiitthiwa Emanuweele, enlupaaye yoori ‘Nluku ori vamote na fweeyo’.”

²⁴Paata ya olankha, Yuusufu khuretta etile nlayikha la Mbwana laamuziyeeyo khumpokhera Mariyamu muukhaawe.

²⁵Ye khaarapalelaniye mpakha ompattha mwaana. Khuntthaja nzina la Yinsa.