MATEO 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Laa yra la mén ne nak xpenkwlal Jesucrist nee, Jesucrist ne zëëd xnëz rrey-David no ne zëëd xnëz Abraham.

²Abraham nak xuz Isaac, Isaac nak xuz Jacob, Jacob nak xuz Judá yra bech Judá,

³Judá nak xuz Fares yrup Fares Zara, le xnaa men nak Tamar, Fares nak xuz Esrom, Esrom nak xuz Aram,

⁴Aram nak xuz Aminadab, Aminadab nak xuz Naasón, Naasón nak xuz Salmón,

⁵Salmón nak xuz Booz, le xnaa Booz nak Rahab, Booz nak xuz Obed, le xnaa Obed nak Rut, Obed nak xuz Isaí,

⁶Isaí nak xuz rrey-David, rrey-David nak xuz Salomón, le xnaa Salomón nak men ne wak xewnaa Urías.

⁷Salomón nak xuz Roboam, Roboam nak xuz Abías, Abías nak xuz Asa,

⁸Asa nak xuz Josafat, Josafat nak xuz Joram, Joram nak xuz Uzías,

⁹Uzías nak xuz Jotam, Jotam nak xuz Acaz, Acaz nak xuz Ezequías,

¹⁰Ezequías nak xuz Manasés, Manasés nak xuz Amón, Amón nak xuz Josías,

¹¹Josías nak xuz Jeconías yra bech Jeconías tyemp ne wzanofwers men-Babilonia men-Israel wyano men men Babilonia.

¹²Nga ka men chene wal Salatiel xpee Jeconías. Salatiel nak xuz Zorobabel,

¹³Zorobabel nak xuz Abiud, Abiud nak xuz Eliaquim, Eliaquim nak xuz Azor,

¹⁴Azor nak xuz Sadoc, Sadoc nak xuz Aquim, Aquim nak xuz Eliud,

¹⁵Eliud nak xuz Eleazar, Eleazar nak xuz Matán, Matán nak xuz Jacob,

¹⁶Jacob nak xuz Xeb xemgyeey Mli ne nak xnaa Jesus ne la ke Crist.

¹⁷Chidaa ngwzan wuu kwlotee Abraham axtegue rrey-David, schidaa ngwzan wuu kwlotee rrey-David axtegue chene wzano men-Babilonia men-Israel ne wyano men men Babilonia, schidaa ngwzan wuu nga axtegue ne wal Jesucrist.

¹⁸Zeree wak chene wal Jesucrist: Che nuu Mli xnaa Ne ne ytsëlnya men yrup men Xeb; per antes ne tsuu men yrup men, wakzhiin Mli por xpoder Espíritu Sant.

¹⁹Kom kesentyent wen Xeb, wlaandet men nboo men xeblaan Mli; mazdee wlebleedx men nsalzaan men Mli ngueedxendxee.

²⁰Zenga rlebleedx men chene wlalo te xangel Dëdyuzh lo men lo mkaal, re angel guin: ―Xeb ne zëëd xnëz David, ydxedet de ytsëlnyano de Mli, porke mëëd ne gap men, por xpoder Espíritu Sant wuu ne.

²¹Gap men te mëdbee, ynesela de ne JESUS, porke laa ne yselaa yra xpén ne lo xdol men.

²²Wak yra neree chen gak kumplir diiz ne re Dëdyuzh lo profet, laa we nga re:

²³Gakzhiin te nzeb-benak, gap men te mëdbee ne sela Emanuel. Emanuel rna: Dëdyuzh zu kon laa be.

²⁴Chene wruu mkaal lo Xeb, wlaa Xeb zegne wkyeen xangel Dëdyuzh Xeb. Wtsëlnya Xeb yrup Xeb Mli.

²⁵Per wgaldetgue Xeb Mli axtegue ne wal xpëëd Mli. Lex wnesela Xeb ne JESUS.