Matyu 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yomba i Yesus Krais kowamo awamo wagle ye kangino epigl. Yesus ye Devit yungumo ombuno mina ta moglkwa. Te Devit ye Abraham yungu ombunomo ta moglkwa.

²Abraham ye wam Aisak, te Aisak ye wam Jekop, te Jekop ye wam Juda ya te angiglma tau bogl meglkwa.

³te Juda ye wam suwo Peres ya Sera. Ye suwo i mano Tamar. Peres ye wam Hesron, te Hesron ye wam Ram,

⁴te Ram ye wam Aminadap, te Aminadap ye wam Nason, te Nason ye wam Salmon,

⁵te Salmon ye wam Boas, ye mam Rehap, te Boas ye wam Obet, ye mam Rut, te Obet ye wam Jesi,

⁶te Jesi ye wam King Devit moglkwa, te Devit ye wam Solomon ye mam okuna imbo Uriya embiye kra,

⁷te Solomon ye wam Rehoboam, te Rehoboam ye wam Abiya, te Abiya ye wam Asa,

⁸te Asa ye wam Jehosafat, te Jehosafat ye wam Jehoram, te Jehoram ye wam Usia,

⁹te Usia ye wam Jotam, te Jotam ye wam Ahas, te Ahas ye wam Hesekia,

¹⁰te Hesekia ye wam Manase, te Manase ye wam Emon, te Emon ye wam Josaia,

¹¹te Josaia ye wam Jehoiakin ya te angiglma tau meglkwa. Enge igle Israel yomba kane ende Babilon eingwa.

¹²Ye kane ende pi Babilon eingo, ana Jehoiakin ye wam Sialtiel, te Sialtiel ye wam Serubabel,

¹³te Serubabel ye wam Abiut, te Abiut ye wam Eliakim, te Eliakim ye wam Asor,

¹⁴te Asor ye wam Sadok, te Sadok ye wam Akim, te Akim ye wam Eliut,

¹⁵te Eliut ye wam Elieser, te Elieser ye wam Matan, te Matan ye wam Jekop,

¹⁶te Jekop ye wam Josep. Ana Josep ye Maria wiye moglkwa. Te Maria Yesus kugl yongwa, ye kangiye Krais we dingwa.

¹⁷Yegl orko Abraham kowamo awamo mogl wingo ende wu Devit moglkwa engemo i epiglmo 14 orkwa. Te Devit kowamo awamo mogl ende wu kane Babilon eingwa i epigl 14 orkwa. Te ye mambuno bogl mogl ende wu kane Babilon pindre ende ikine wingo Krais enge igle plau dungwa, yomba i ama prapra epigl 14 orkwa.

¹⁸Yesus Krais plaudi moglkwa kamo boglo i yegl. Mam Maria ye Josep inambe dipandiglkwa. Ba ye akiye ta pai wanmoglkiurko, ye kanigwa Maria gak dane moglkwa. I Holi Spirit gak dane moglkwa.

¹⁹Wiye Josep, ye yagl du-yene. Ye prukwa Maria gak dane moglme digo, ye kinde kondinagledi prukwa. Ba ye yegl erimbo Maria ye yomba ongumutno wagle angai gogl dinambedi prukwa. Yeglpre ye uglmange ere kondinagledi prukwa.

²⁰Josep taragl i poglodi pir moglko, uglkumbu mina Yaglkande angelomo suwarata plau dite yegl dungwa, “Josep, ene Devit yungumo ombuno ta motnga, ene Maria i-wanatnga i embin mereyegl i-wanatnga, ipre ene kundugl goglkro. Pro. Gak etne dane mina moglkwa i Holi Spirit gak moglkwa.

²¹Ye yagl gak ta kurambuka, ene kangiye Yesus we dinatnga. Sraglpre, ye yombama tandaglmeno koko ende te, ye ere-inambuka.”

²²Taragl prapra plau dungwa i Yaglkande kamo propet dumere mere paiyungwa. Propet ka yegl dungwa,

²³“Piryo, ambai mor ta ye yagl bogl ta akiye wanmoglpai erekrambuka. Ye gak dane panan yagl gak ta kugl yenambuka. Ana ye kangiye Imanuel we dinaglkwa.” Kangiye i mambunomo yegl, “God nono bogl akiye moglkwa.”

²⁴Ana Josep ye ugl pamara andigltre, ye Yaglkande angelomo ditomere ere, Maria embiye mereyegl auro yend yungumugl ongwa.

²⁵Ba ye akiye ta kungro paikre wanmogl embriko, ana Maria wam kugl yongwa. Ana Josep eremogl gak kangiye Yesus we dungwa.