1Khuwaakhuwela anakhiyoni awe apale khumi na awiri, khuwenkha owahi wa wiikara masheethwani, na ovonisa moolwele na marati ooshi.
2Apa mazina a anakhiyoni khumi na awiri: Wamwanzo, Simawu, anjuwaniwaaye nzina la Pheeturu, na ttwiiye Antere; Tiyaaku, mwaana wa Zepeteewu, na Yaahaya ttwiiye;
3Filiipe na Paturumeewu; Tome na Matewuzhu, namariphisa lumpuru; Tiyaaku mwaana wa Alufeeyu, na Tadeewu;
4Simawu Zelooti, na Yuuda Eshikariyoote, othuuto anzinkuliyeeyo.
5Yinsa khuwaaruma apale khumi na awiri na khuwooza yoori: “Mwiheette wa amalapo, wala mwiheette hatha sitati moote ya a Samariiya.
6Ila khapula mweettele pwittipwitthi zawaashikha za Ezirayiilu.
7Wakhula vahali mwineettaavo, mwitafusiri hapari epi mwiraka: ‘Ofwalume wa pinkuuni ori kharipu!’
8Mwiwaavonisaka anamarati, mwiwaasisimulaka ananfwa, mwiwaatwahareshaka anamaharaja, mwiikare masheethwani. Mweeyo mwapokhera mahala na mwina yawinkha mahala.
9Mwihithuule hatha thahapu, wala feeta, wala khoopiri mmwizako mwenu;
10Mwihithuule hatha kuwo kiina, wala jampali, wala pakhora, maana nakhaazi eninsuhi wiiyana etthu yoojiwa yawe.
11Na wakhula sitati ama mmwanttiwa, mwimweekese ntthu woojishitahi, mwiikhale owawe othuuto mpakha malawelo enu.
12Amana mwivira nnyupa, mwichelise.
13Nkhama atthu a nyuupa etile eeya oosuhi, heeri yenu mweeyo yiiye vamote na-yo; amana ahisuhi, heeri yenu ti yuuruteleni.
14Amana ntthu ahuupokherelini na khuhitakhi osiila mattakhuzi enu, mwitathe lifufu la mmoolu mwenu mwileemo nnyupa mwaya mphule ama nsitati mwaya mphule.
15Miiyo kiniwuuzani khweele yoori, siikhu ya ophukiwa enttela wiiyavo tthakaraka khwa Sotooma na Komoora zayita sitati ya eto.
16“Miiyo kinuurumani mweeyo nkhama pwittipwitthi vakatthi wa miiji; nakataalikha mwiiye alavilavi nkhama nyookha na oohiina zootakhala nkhama jiwa.
17Mwiiyane phoole, maana atthu anlawa oottheni nnyupa woophukaniwamo na wuujaphani mmasinakooka mwaya.
18Mwaasa wa miiyo, mwinlawa mwalawaniwe vakatthi wa misatoro na afwalume, yoori wiiye oshaahiti anttelaaye orumeyela, yo na amalapo monkoni wa hapari zaka.
19Ila amana oofukelani, mwihishanke etthu yoolupa, ama yooretta. Wakathi aya opo, Nluku onttela owinkhani mattakhuzi olupa,
20maana khahiyo mweeyo mwinttelaaye ottakhula, ila Rooho ya Papeenu ti enttelaaye ottakhula khwa mweeyo.
21“Ttwi mmote onlawa anleve ttwiiye yoori ooliwe, na paapa onleva mwanawe; aana anlawa awaazukuluwele apapa zaya na awoole.
22Atthu ooshi anttela owiinani mwaasa wa miiyo, ila otule anttelaaye ovilela mpakha mwiisho ontta wuusurukha.
23Amana mwifiya nsitati khulupatthiwa, mwitthirele sitati kiina. Weekhweele miiyo kiniwuuzani yoori khamwinteela wiisha ozukulela Ezirayiilu yooshi Mwaana wa Pinaatamu ahiteeni.
24“Nakhiyoni khaninziti mwaaliimu awe, wala karumeya khaninziti mbwana awe.
25Nakhiyoni ona yoofurahi amana anfiyela mwaaliimu awe, na karumeya amana anfiyela mbwana awe. Moone, amana mweenyewe nyuupa attukhaniwa khutthajiwa Belezibuuli, khi ajamaaze khatepeeni!
26“Nakataalikha mwihiwoove apo aya. Khayiivo yoottiyeleliwa ehinteelaaye othoonyeziwa wala yoovithiwa ehinteelaaye ojuwiwa.
27Eti kiniwuuzaani n'yiiza mwilupe nthana. Na etile mwisiiliyeeyo sirini mwaamuuze vatulu wa nyuupa.
28Mwihimoove otule anuulaaye mwiili, ahina owahi wa wuula nafusi. Khapula mwimoove otule anwahaaye otapanya mwiili na nafusi khweeselela motthooni.
29Anyannyi awiri anuuzanyiwa nzurukhu mmote, ila khina mmote ankwelaaye vathi Papeenu ahitakheeni.
30Hatha nyuuli za mmwishwa mwenu zooshi pi za waalakiwa.
31Nakataalikha mwihoove! Mweeyo mwinaaye fwayita zayita anyannyi.
32“Wakhula otule antukhurwaaye yoori ti waka vakatthi wa atthu, na miiyo kintukhuru khwa ye, vakatthi wa Paapa ariiye pinkuuni.
33Ila otule anikikatthalaaye vakatthi wa atthu, na miiyo kinttela onkatthala vakatthi wa Paapa ariiye pinkuuni.
34“Mwihaakanyere yoori miiyo katiisa heeri voolumwenku; akitiseeni heeri, katiisa phanka.
35Miiyo kata yoori oomane mwaana na papaawe, mwaana wankha na mamaawe, namaraliwa na nkhwewe.
36Maatuwi khaamili a ntthu anlankha vakatthi wa ajamaaze.
37Otule animphetaaye mamaawe ama papaawe zayita miiyo khansuhi wiiya namalottela aka; otule animphetaaye mwanawe zayita miiyo, khansuhi wiiya namalottela aka.
38Otule ahinvikelaaye nsalapa awe akilotta, khansuhi wiiya namalottela aka.
39Otule aneekesaaye ohaayi awe ontta omwaashikha, na otule onimwaashikhaaye ohaayi awe mwaasa wa miiyo ontta opattha.
40“Wakhula otule anuupwekherelaanini akipwekherela miiyo, na otule anikipwekherelaaye ampwekherela otule akirumiyeeyo.
41Otule animpwekherelaaye napiyu mwaasa wa ye wiiya napiyu, ompwekhera tthuvo ya napiyu; otule animpwekherelaaye nashariya mwaasa wa ye wiiya nashariya, ompwekhera tthuvo ya nashariya.
42Na wakhula otule animwinkhaaye nsimaana hatha nkhama koopho ya maati oozizima, mwaasa wa ye wiiya nakhiyoni aka, kiniwuuza khweele yoori oto aya onlawa apwekhere tthuvo yawe.”
