Matiu 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ngan ak be vatimol xil na Iesu Kristo, xa tehe tei e vatimol na suv toto Deved tetiamu, xa tehe tei e vatimol na Ebraham tetiamu.

²Ebraham, xi tehe tame Aesak, xa tehe tame Siekob, xa tehe tame Sudah tetel tuneli xil.

³Sudah, xi tehe tame Peres xal Siera, xa ninexalu Tamar. E Peres, xi tehe tame Hesron, xa tehe tame Ram.

⁴Ram, xi tehe tame Aminatap, xa tehe tame Nashon, xa tehe tame Salmon.

⁵Salmon, xi tehe tame Boas, e ninen Rehab. E Boas tehe tame Obed, e ninen Rut. E Obed tehe tame Tiese,

⁶xa tehe tame suv toto Deved. Suv toto Deved, xi tehe tame Solomon, e ninen tehe tunau na Uraea.

⁷Solomon, xi tehe tame Rehoboam, xa tehe tame Abitsa, xa tehe tame Asa.

⁸Asa, xi tehe tame Sehosavat, xa tehe tame Sehoram, xa tehe tame Usaea.

⁹Usaea, xi tehe tame Siotam, xa tehe tame Ehas, xa tehe tame Hesekaea.

¹⁰Hesekaea, xi tehe tame Manase, xa tehe tame Amon xa tehe tame Sosaea.

¹¹E Sosaea, xi tehe tame Sekonaea e tuneli xil. E melele nen ak, mol‑Babilon xil mei latehas tan ni mol‑Isrel xil e lateleh rerat xil latehe kantri te hal Babilon.

¹²Ngan xil sung ak, xil labe avu xil xa latemei tetutou ni melele xa mol‑Isrel xil latehe reling kantri te hal Babilon: Sekonaea, xi tehe tame Seltiel, xa tehe tame Serubabel.

¹³Serubabel, xi tehe tame Apiut, xa tehe tame Eliakim, xa tehe tame Asor.

¹⁴Asor, xi tehe tame Sadok, xa tehe tame Akim, xa tehe tame Eliud.

¹⁵Eliud, xi tehe tame Eliesar, xa tehe tame Matan, xa tehe tame Siekob.

¹⁶Siekob, xi tehe tame Siosep, xa tehe tiramue na Meri, xa tehe nine Iesu, xa latekesi ni Mesaea xa Hi tehit xati tehit isa ni imei.

¹⁷Mak, ma melele xa labuli vatit avu xil xa lateti e vatimol na Iesu, Ebraham tetuxoh suv toto Deved, lakameti xa latehe hat e le tei (14). E lakameti xa Deved tetuxoh melele xa mol‑Isrel xil latehe kantri te hal Babilon, vatit avu xil ak latehe hat e le tei (14). E melele xa mol‑Isrel latehe reling hal Babilon tetuxoh melele xa Mesaea tepot e ut etan, vatit avu xil ak mun latehe hat e le tei (14).

¹⁸Ngan ak be tumulen usil naha xa testal tetiamu ni poten na Iesu xa tehe Mesaea na Hi. Meri xa ihe nine Iesu, latesikoe xole ngamu tengan mei ihe atou na Siosep. E melele xa lutnati vituei ti mu, latekameti xa Meri teti tuei ni tuvava texo xeihen na Ninin Eo.

¹⁹Vengan xa Siosep, tiramue na Meri, sexien nan xil momal pe met Hi, xi tenemi tehit isil rati. E xi ien ti tavei vapol ni Meri vahe unoun pe met moletin xil. Ma xi bit xalu lalitasil e suse xa moletin xil linakil ti.

²⁰E melele xa Siosep di tamu minem usil rin ak, masxaxa tei na Hi Suv mei mistal mini e metuveen tei e biteni mini bit, “Siosep, vatimol na suv toto Deved tetiamu, ulum nakan ti tengan uhur Meri ihe atou nam, vengan xa tuvava xa di ni nggo xeihen na Ninin Eo.

²¹Meri iling horamue ak, e xouk uling hisen ihe ‘Iesu’ xa koute teni be ‘Iahova di miteh meulien,’ vengan xa xi iteh meulien e moletin nan xil ra tesaen nae xil.”

²²Holesok xil ak mei mistal tengan vapol ni sepinien xa Hi Suv tehit lelen ni texo provet nan mei vahe reitin xa tehit,

²³“!Muteong kuhi! Atul maxoe tei xa takil ti mu tiramue, xi di ni tuvava tei. Ti, ilingi ihe malohos e liling hisen ihe ‘Imanuel’ xa koute teni be ‘Hi di mi xir.’”

²⁴Melele xa Siosep milale, xi pol nggusil naha xa masxaxa na Hi Suv tesemae ni mini. Ma xi nggur Meri mei be atou nan e ludi vituei.

²⁵E xi tapat ti vatela ba duxoh melele xa Meri miling horamue nan. E melele xa miling horamue ak, Siosep miling hisen be Iesu.