Mataiyo 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Teina ta Yesu Keliso kana kulutubuwao. Abelahama unai ye hetubu ye dobi Dawida iya wasawasa, na kabo ye dobi ede Yesu unai.

²Abelahama natuna Isako, Isako natuna Yakobo, Yakobo natuna Yuda ma kana kahao.

³Yuda natunao Pelesi yo Sela, sinadi ede Tamala. Pelesi natuna Heselona, Heselona natuna Lama.

⁴Lama natuna Aminadaba, Aminadaba natuna Nasona, Nasona natuna Salamona.

⁵Salamona natuna Bowasi, na sinana ede Lahaba. Bowasi natuna Obedi, sinana ede Luti. Obedi natuna Yese,

⁶Yese natuna Dawida, iya ede wasawasa. Dawida natuna Solomona, sinana ede Bateseba, iya meta Ulaiya kwabulina.

⁷Solomona natuna Lehobowama, Lehobowama natuna Abiya, Abiya natuna Asa.

⁸Asa natuna Yehosapata, Yehosapata natuna Yeholama, Yeholama natuna Usiya.

⁹Usiya natuna Yotama, Yotama natuna Ahasa, Ahasa natuna Hesekiya.

¹⁰Hesekiya natuna Manase, Manase natuna Amona, Amona natuna Yosiya.

¹¹Yosiya natuna Yekoniya ma kana kahao. Siya yodi huya unai Babeloniya yona tauꞌiyala se laoma Yudeya tanona tamowaidiyao se haidi se laedi Babeloniya.

¹²Na muliyena kabo Yekoniya natuna Salatiyela, Salatiyela natuna Selubabela.

¹³Selubabela natuna Abiuda, Abiuda natuna Eliyakima, Eliyakima natuna Asowa.

¹⁴Asowa natuna Sadoka, Sadoka natuna Akima, Akima natuna Eliuda,

¹⁵Eliuda natuna Eleyasala, Eleyasala natuna Matana, Matana natuna Yakobo,

¹⁶Yakobo natuna Yosepa. Yosepa mwanena Maliya. Maliya natuna ede Yesu, iya hesana ta katai ede Keliso.

¹⁷Unai, Abelahama kana isimulitao ye dobi Dawida unai meta isi saudoudoi-hasi (14), yo Dawida unai ye dobi huyana se laedi Babeloniya, isidiyao meta saudoudoi-hasi (14), na kabo ye dobi Keliso unai meta hinage isi saudoudoi-hasi (14).

¹⁸Yesu Keliso huyalabasina wasana ede doha teina: Maliya Yesu sinana se hededehepatulaei Yosepa unai, na sola nige se miyakesega, na ye masalaha na kabina se kata meta Maliya ye diyaka Yaluwa Tabuna logulogunaena.

¹⁹Na Yosepa meta tamowai namwanamwana, na nige ye henuwa Maliya ye hemwadine tamowai matadiyena. Unai yona nuwatu bena wadawadamyena ye inawasei.

²⁰Sola ye nuwanuwatu, na Guiyau yona anelu ye laoma kenosuwaiyena ye hededelau unai ye wane, “Yosepa Dawida natuna, tabu ku matausi na Maliya ku tawasolai. Iya natuna meta Yaluwa Tabuna unai ye tubuma.

²¹Iya kabo natuna loheya ye labasi, na hesana kabo ku tole Yesu, matawuwuna iya boda Isalaela yodi yababa udiyedi kabo ye gilihaidi.”

²²Ginauli maudoidi ta se tubu bena Guiyau yona hedehededepeloweta kawanaena ye hededenonohaiyako wa ye hemamohoiyei:

²³“Hasala nuwanuwasupuna kabo ye diyaka, na kabo natuna loheya ye labasi. Iya kabo hesana ede Emanuwela” Emanuwela kaniyona ede “Yaubada maiyada”.

²⁴Yosepa ye kenotolo ede Guiyau yona anelu yona hedehedede wa ye lauwatani na Maliya ye woyaiyama yona magaiyena ye kitahetete.

²⁵Na sola Maliya ma nuwanuwasupuna ye lau ee kana siga natuna ye labasi. Na Yosepa hesana ye tole ede Yesu.