Mateos 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Susuraꞌ ia tui laꞌe-neuꞌ Yesus Kristus, Lahenda fo riꞌ nemeꞌ uluꞌ mai Manetualain helu memaꞌ nau fee Ni mai. Ria nana, mane Daud ma baꞌi Abraham tititi-nonosin. Mulai neme baꞌi Abraham losa mane Daud a, nana tititi-nonosiꞌ sanahulu haa. Ria bei-baꞌin nade nara siꞌ: Abraham boki Isak, Isak boki Yakob, Yakob boki Yahuda no aꞌa-fadi nara,

³Yahuda boki Peres no Sera (sira mama na, nade Tamar), Peres boki Herson, Herson boki Ram,

⁴Ram boki Aminadab, Aminadab boki Nahason, Nahason boki Salmon,

⁵Salmon boki Boas (ria mama na, nade Rahab), Boas boki Obet (ria mama na, nade Rut), Obet boki Isai,

⁶Isai boki Daud. Neme Daud losa tepoꞌ fo lahenda nusa Israel nanatuꞌu leo Babel reu, nana tititi-nonosiꞌ sanahulu haa bali, siꞌ: Daud boki Soleman (ria mama na, riꞌ maulu na Uria sao na).

⁷Soleman boki Rehabeam, Rehabeam boki Abia, Abia boki Asaf,

⁸Asaf boki Yosafat, Yosafat boki Yoram, Yoram boki Usia,

⁹Usia boki Yotam, Yotam boki Ahas, Ahas boki Heskia,

¹⁰Heskia boki Manase, Manase boki Amos, Amos boki Yosias,

¹¹Yosias boki Yekonya no fadi nara tepoꞌ fo sira nanatuꞌu leo Babel reu.

¹²Tepoꞌ fo sira nanatuꞌu leo Babel reu losa Yesus, nana tititi-nonosiꞌ sanahulu haa bali, siꞌ: Yekonya boki Saltiel, Saltiel boki Serubabel,

¹³Serubabel boki Abihut, Abihut boki Elyakim, Elyakim boki Asor,

¹⁴Asor boki Sadok, Sadok boki Akim, Akim boki Eliut,

¹⁵Eliut boki Eliasar, Eliasar boki Matan, Matan boki Yakob,

¹⁶boe ma Yakob boki Yusuf. Yusuf, sao Maria. Maria, riꞌ boki Yesus Kristus.

¹⁷De, mulai neme Abraham losa Daud, nana tititi-nonosiꞌ sanahulu haa; neme Daud losa sira nanatuꞌu leo Babel reu tititi-nonosiꞌ sanahulu haa; ma neme Babel mai losa boki Kristus, nana tititi-nonosiꞌ sanahulu haa.

¹⁸Maria boki Yesus a, tutui na leo iaꞌ: Maria no Yusuf rahihii aoꞌ so. Dua si bei ta parnaa suku rabua sama leoꞌ sao touꞌ no sao inaꞌ, matetuꞌ na Maria nairu neme Manetualain Dula-dale Malalao-malalafu Na mai.

¹⁹Tepoꞌ fo Yusuf nalelaꞌ nae Maria nairu leo naꞌ, boe ma ana nau namaetuꞌ noo ni. Tehuu ana ta nau tao namamaeꞌ Maria nai lahenda dodouꞌ matan, nana huu ria nanuu dale lalao-lalafuꞌ. De ana nau namaetuꞌ namanininoꞌ.

²⁰Ana bei afi neu-mai, hatuꞌ esa boe ma ana nala mei. Nai meis ria, ana nita Manetualain eilaꞌo-limalopen nai nusatetu-ikutemaꞌ a mai nafada ni nae, “Ae, Yusuf! O ia, mane Daud a tititi-nonosin. O dale ma bosoꞌ dodaꞌ sao Maria. Huu fo ana nairu anaꞌ ria, nana huu Manetualain Dula-dale Na kuasan.

²¹Neuꞌ ko Maria boki naa ana touꞌ esa. Boe ma o muste foi Ni, nade Yesus, huu fo Ria riꞌ neuꞌ ko poꞌi-tata naa Manetualain lahenda nara reme sala-siko nara mai.”

²²Hihii-nanauꞌ ia neuꞌ ko dadi leoꞌ na, nana huu Manetualain nafada memaꞌ neme uluꞌ mai so. Ana parnaa pake mana nesi matan Yesaya fo duiꞌ nae,

²³“Emi nenene! Neuꞌ ko ana feto esa bei ao-tema, tehuu nairu so. Boe ma boki naa Ana touꞌ esa. Ara foi Ni nade, Imanuel.” (Nai dedea Ibrani, ‘Imanuel’ sosoa na: Manetualain sama-sama noo ita.)

²⁴Yusuf nala mei basa, boe ma ana foa. Ana tuka memaꞌ Manetualain nafada Na. Ana sao na Maria,

²⁵tehuu ta suku noꞌ ana sama leoꞌ saotou-saoinaꞌ losaꞌ Maria boki heni Anaꞌ ria. Boki Anaꞌ ria, boe ma Yusuf foi Ni nade Yesus.