Madiu 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Iet irekidien dih kan me sapwellimen Sises Krais, me kisehn kadaudok en Depit oh kisehn kadaudok en Eipraam.

²Iet irekidien dih kan sang Eipraam oh lel Nanmwarki Depit: Eipraam me semen Aisek; Aisek me semen Seikop; Seikop me semen Suda oh rie ko.

³Suda me semen Peres oh Sera (inara Damar); Peres me semen Esron; Esron me semen Ram;

⁴Ram me semen Aminadap; Aminadap me semen Nahson; Nahson me semen Salmon;

⁵Salmon me semen Pohas (me ine Reap); Pohas me semen Oped (me ine Rud); Oped me semen Sehsi;

⁶a Sehsi me semen Nanmwarki Depit. Iet irekidien dih kan sang Nanmwarki Depit lel ahnsou me mehn Israel kan kalipilipala nan wehin Papilon: Depit me semen Solomon, sang en Uraia eh pwoud.

⁷Solomon me semen Reopoham; Reopoham me semen Apaisa; Apaisa me semen Asa;

⁸Asa me semen Seosopat; Seosopat me semen Soram; Soram me semen Usaia;

⁹Usaia me semen Sodam; Sodam me semen Ahas; Ahas me semen Esekaia;

¹⁰Esekaia me semen Manase; Manase me semen Amon; Amon me semen Sosaia;

¹¹Sosaia me semen Sekonaia oh rie ko ahnsou me mehn Suhs ako sellahng Papilon.

¹²Iet irekidien dih kan mwurin ar sellahng Papilon lel ni ipwidien Sises: Sehoakim me semen Sealtiel; Sealtiel me semen Serupapel;

¹³Serupapel me semen Apiud; Apiud me semen Elaiakim; Elaiakim me semen Asor;

¹⁴Asor me semen Sadok; Sadok me semen Akim; Akim me semen Eliud;

¹⁵Eliud me semen Eliesar; Eliesar me semen Madan; Madan me semen Seikop;

¹⁶Seikop me semen Sosep, en Mery eh pwoud, me kaipwiedi Sises, me mwarenki Mesaia.

¹⁷Eri, dih eisek pahieu mie sang Eipraam lel Depit; a sang Depit lel ahnsou me mehn Suhs ako sellahng Papilon, pil dih eisik pahieu; a sang ahnsowo lel ipwidien Mesaiao, pil dih eisek pahieu.

¹⁸Eri, iet duwen ipwidien Sises Krais: ine Mery me kisinihniong Sosep, ira ahpw saikinte pwopwoudida, e pehmada duwen eh ketin liseian ahpw sang Ngehn Sarawi.

¹⁹Eh werek, Sosep, ni eh ohl lelepek oh pwung oh sohte men kahdsuwedihla Mery mwohn aramas akan, e ahpw lemehda en mweisang ni rir.

²⁰Eri, ni eh medemedewe met, iet tohnleng en Kaun-o men ahpw pwarodo nan eh meir oh mahsanihong, “Sosep kisehn kadaudok en Depit, ke dehr perki ale Mery omw werek, pwe wahn nan kupwure e ahpikihda Ngehn Sarawi.

²¹E pahn ketin naitikihada sapwellime pwutak emen me ke pahn kihong mware Sises— pwe e pahn ketin kapitasang sapwellime aramas akan nan diparail kan.”

²²Eri, mepwukat koaros wiawiher pwe en pweida me Kaun-o mahsanihong soukohpo pwe en lohkihda, ni eh mahsanih,

²³“Meipwono pahn liseianda oh naitikihda nah pwutak emen, me re pahn kamwarehki Emanuel” (me wehwehki, “Koht kin ketiket rehtail”).

²⁴Sosep eri pirida, e ahpw kapwaiada me tohnleng en Kaun-o mahsanih. E ahpw ale Mery oh pwoudikihda.

²⁵Eri, Sosep sohte kapwaiada nsenen pwopwoud ong Mery mwohn eh naitikihada sapwellime pwutako. Sosep eri kihong mware, Sises.