Mateo 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Aꞌ u tachul ibꞌii qꞌul ikꞌuy imam u Jesucristo tzaꞌ, vituꞌxh ixalam u Daviid utz, vituꞌxh ixalam u Abrahaam.

²Uncheeꞌ aatz u Abrahaam, aꞌ ikꞌaol atini u Isaac. Aatz u Isaac, aꞌ ikꞌaol atini u Jacoob. Aatz u Jacoob, aꞌ ikꞌaol atini u Judaa tuchꞌ tereꞌn qꞌu tatzik tuchꞌ itzaꞌqꞌ.

³Aatz u Judaa, aꞌ initxaꞌa atin tuchꞌ u Tamaar, u Fares tuchꞌ u Zara. Aatz u Fares, aꞌ ikꞌaol atini u Esroom. Aatz u Esroom, aꞌ ikꞌaol atini u Araam.

⁴Aatz u Araam, aꞌ ikꞌaol atini u Aminadaab. Aatz u Aminadaab, aꞌ ikꞌaol atini u Nasoon. Aatz u Nasoon, aꞌ ikꞌaol atini u Salmoon.

⁵Aatz u Salmoon, aꞌ initxaꞌa atin tuchꞌ u Rahaab, u Booz. Aatz u Booz, aꞌ initxaꞌa atin tuchꞌ u Rut, u Obeed. Aatz u Obeed, aꞌ ikꞌaol atini u Isaii.

⁶Aatz u Isaii, aꞌ ikꞌaol atini u ijlenal Daviid. Aatz u ijlenal Daviid, aꞌ ikꞌaol atini u Salomoon, initxaꞌa tuchꞌ u ixoj vaꞌl tixojich u Urias.

⁷Uncheeꞌ aatz u Salomoon, aꞌ ikꞌaol atini u Roboaam. Aatz u Roboaam, aꞌ ikꞌaol atini u Abias. Aatz u Abias, aꞌ ikꞌaol atini u Asa.

⁸Aatz u Asa, aꞌ ikꞌaol atini u Josafaat. Aatz u Josafaat, aꞌ ikꞌaol atini u Joraam. Aatz u Joraam, aꞌ ikꞌaol atini u Uzias.

⁹Aatz u Uzias, aꞌ ikꞌaol atini u Jotaam. Aatz u Jotaam, aꞌ ikꞌaol atini u Acaaz. Aatz u Acaaz, aꞌ ikꞌaol atini u Esequias.

¹⁰Aatz u Esequias, aꞌ ikꞌaol atini u Manasees. Aatz u Manasees, aꞌ ikꞌaol atini u Amoon. Aatz u Amoon, aꞌ ikꞌaol atini u Josias.

¹¹Aatz u Josias, aꞌ ikꞌaol atini u Jeconias, tuchꞌ tereꞌn itzaꞌqꞌ. Aꞌ titzꞌpeꞌ tikuenta u txaypichil bꞌen tu u txꞌavaꞌ Babiloonia.

¹²Uncheeꞌ xamtich tek tiꞌ u txaypichil bꞌen tu Babiloonia, aatz u Jeconias, atin ikꞌaol; ayaꞌ u Salatieel. Aatz u Salatieel, aꞌ ikꞌaol atini u Zorobabeel.

¹³Aatz u Zorobabeel, aꞌ ikꞌaol atini u Abiuud. Aatz u Abiuud, aꞌ ikꞌaol atini u Eliaquiim. Aatz u Eliaquiim, aꞌ ikꞌaol atini u Azoor.

¹⁴Aatz u Azoor, aꞌ ikꞌaol atini u Sadooc. Aatz u Sadooc, aꞌ ikꞌaol atini u Aquiim. Aatz u Aquiim, aꞌ ikꞌaol atini u Eliuud.

¹⁵Aatz u Eliuud, aꞌ ikꞌaol atini u Eleazar. Aatz u Eleazar, aꞌ ikꞌaol atini u Mataan. Aatz u Mataan, aꞌ ikꞌaol atini u Jacoob.

¹⁶Aatz u Jacoob, aꞌ ikꞌaol atini u Xhep. Ayaꞌ vivinaj u Liꞌ, u alan tetz u Jesuus. Aatz u Jesuus, aꞌ viTxaaom u Tioxh.

¹⁷Uncheeꞌ ech 14 tanul qꞌu kꞌuya mama tziꞌ, nixeꞌtkꞌasuꞌl tiꞌ u Abrahaam utz, nuꞌlyaꞌoj tiꞌ u Daviid. Utz aatz nixeꞌtkꞌasuꞌl tiꞌ u Daviid, neꞌnyaꞌoj tu u txaypichil bꞌen tu Babiloonia, 14 paj tanul. Xeꞌt paj kꞌasuꞌl tiꞌ u txaypichil bꞌen tu Babiloonia utz, nuꞌlyaꞌoj tu u titzꞌpebꞌal u Jesuus viTxaaom u Tioxh, 14 pajeꞌ.

¹⁸Uncheeꞌ ech u titzꞌpu u Jesucristo tzaꞌ. Aatz u Liꞌ, vinan u Jesuus, oknajich tek u Xhep tiꞌ. Utz aatz yeꞌsajich motx ikꞌultu tibꞌ, atin u Liꞌ tu tiichajla yaabꞌil. Loqꞌ titxumbꞌal u Tioxhla Espiiritu.

¹⁹Ech aatz u Xhep, vaꞌl siꞌchbꞌens ivinaj tan, siꞌchtektaqꞌka u Liꞌ itxuma. Yeꞌ naꞌl siꞌchiꞌaneꞌ. Yeꞌt ipaxsa el itziiul, majbꞌal tel iqꞌii tan, jikomla vinajich.

²⁰Tuul ech vaꞌl maꞌtich itxumtaꞌ siꞌaneꞌ, yeꞌk talcheꞌ chee maꞌl u aanjel tetz u Tioxh tivatzikꞌ. Utz tal te ech tzaꞌ: —Xhep, ituꞌxh ixalam Daviid, yeꞌ koꞌxh kaꞌtziiunaxh tiꞌ iiqꞌot u Liꞌ tziꞌ tan, aatz vaꞌl atil kꞌatza, u Tioxhla Espiiritu vetiꞌan itxumbꞌal tiꞌ.

²¹Ech siꞌitzꞌpu maꞌl titzꞌin, xiak. Utz Jesuus vibꞌii looksa tan, aꞌ u Chitol tetz vitenam tu paav.— Texh te.

²²Utz iꞌan koꞌnkoxh ok u kam tziꞌ. Pek aꞌ tzojpi vaꞌl tal u Tioxh titziꞌ u alol tetz viyolbꞌal aas tal ech tzaꞌ:

²³—Aatz siꞌan maꞌl u ixviak, tiira ixviak yeꞌ tootzaj vinaj, saꞌatin tu tiichajla yaabꞌil. Utz sachee maꞌl titzꞌin, xiak. Aatz ibꞌii saoksali utz, Emanueel. Tioxh tu kuxoꞌl chu u tokebꞌal.— Chia.

²⁴Ech aatz kꞌas u Xhep, iꞌan tekuꞌen kam vaꞌl tal u aanjel te utz, tiqꞌo tek u Liꞌ.

²⁵Loqꞌ yeꞌt ok kꞌatza. Itzꞌpu koꞌxh u titzꞌin. Utz aatz itzꞌpi, Jesuus ibꞌii toksa.