Mataioꞌ 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Izesuꞌ Kilisitoꞌ avolomote mini di aniꞌ neti guliveꞌine nene neꞌmino neive: Guvelesi ve Davidiꞌ aza Abalahamuꞌ aꞌvo minineꞌ. Idoꞌ Izesuꞌ Kilisitoꞌ aza Abalahamungi Davidingi ngaꞌvo minineꞌ.

²Abalahamuꞌ nene Isakaꞌni gidineꞌ. Idoꞌ Isakaꞌ minosa Zakoboꞌni gidineꞌ. Idoꞌ Zakoboꞌ minosa Zudaꞌnisi uvolomotine nakunolomotine nesi gidineꞌ.

³Idoꞌ Zudaꞌ nene Tamalaꞌni do Pelezangi Zelangi gidineꞌ. Idoꞌ Pelezaꞌ nene Hezeloniꞌni gidineꞌ. Idoꞌ Hezeloniꞌ minosa Lamuꞌni gidineꞌ.

⁴Idoꞌ Lamuꞌ minosa Aminadabuꞌni gidineꞌ. Idoꞌ Aminadabuꞌ minosa Nasoniꞌni gidineꞌ. Idoꞌ Nasoniꞌ minosa Salemoneꞌni gidineꞌ.

⁵Idoꞌ Salemoneꞌ minosa Lahabaꞌni do Boaziꞌni gidineꞌ. Idoꞌ Boaziꞌ aza Lutiꞌni do Obediꞌni gidineꞌ. Idoꞌ Obediꞌ aza Zesaiꞌ meleho minineꞌ.

⁶Idoꞌ Zesaiꞌ minosa guvelesi ve naba Davidiꞌni gidineꞌ. Idoꞌ Davidiꞌ nene veneꞌ gonoꞌ ma Uliaꞌ elenahine do Solomoniꞌni gidineꞌ.

⁷Idoꞌ Solomoniꞌ nene Lehoboamuꞌ meleho minineꞌ. Idoꞌ Lehoboamuꞌ minosa Abiaꞌni gidineꞌ. Idoꞌ Abiaꞌ nene Asaꞌ meleho minineꞌ.

⁸Idoꞌ Asaꞌ nene Zehosohatiꞌni gidineꞌ. Idoꞌ Zehosohatiꞌ nene Zolamuꞌ meleho minineꞌ. Idoꞌ Zolamuꞌ nene Uziaꞌ avoloho minineꞌ.

⁹Idoꞌ Uziaꞌ nene Zotamuꞌ meleho minineꞌ. Idoꞌ Zotamuꞌ minosa Ahaziꞌni gidineꞌ. Idoꞌ Ahaziꞌ nene Hezekiaꞌ meleho minineꞌ.

¹⁰Idoꞌ Hezekiaꞌ minosa Manaseꞌni gidineꞌ. Idoꞌ Manaseꞌ nene Amoniꞌ meleho minineꞌ. Idoꞌ Amoniꞌ minosa Zosiaꞌni gidineꞌ.

¹¹Idoꞌ Babelonia ve nete igi lovo hizi ngimi Zuda ve ngivileꞌ igi ngeleꞌmizi Babelonia misubouko vaniꞌ gameneuꞌ nene Zekoniaꞌ ve uvele mele nene Zosiadatiꞌ sotoꞌ igi minaniꞌ.

¹²Idoꞌ Babelonia misubouko vi mini adotiꞌ Zekoniaꞌ nene Sealetieleꞌni gidineꞌ. Idoꞌ Sealetieleꞌ nene Zelubabeliꞌ meleho minineꞌ.

¹³Idoꞌ Zelubabeliꞌ sotoꞌ ogo minavo ezelatiꞌ nene Abiudiꞌ sotoꞌ ineꞌ. Idoꞌ Abiudiꞌ sotoꞌ ogo minavo ezelatiꞌ nene Eliakimiꞌ sotoꞌ ineꞌ. Idoꞌ Eliakimiꞌ sotoꞌ ogo minavo ezelatiꞌ nene Azoloꞌ sotoꞌ ineꞌ.

¹⁴Idoꞌ Azoloꞌ sotoꞌ ogo minavo ezelatiꞌ nene Zadokuꞌ sotoꞌ ogo minineꞌ. Idoꞌ Zadokuꞌ sotoꞌ ogo minavo ezelatiꞌ nene Akimiꞌ sotoꞌ ineꞌ. Idoꞌ Akimidotiꞌ nene Eliudiꞌ sotoꞌ ogo minineꞌ.

¹⁵Idoꞌ Eliudiꞌ sotoꞌ ogo minavo ezelatiꞌ nene Eleazaleꞌ sotoꞌ ineꞌ. Idoꞌ Eleazaleꞌ sotoꞌ ogo minidotiꞌ nene Mataniꞌ sotoꞌ ineꞌ. Idoꞌ Mataniꞌ sotoꞌ ogo minavo ezelatiꞌ nene Zakoboꞌ sotoꞌ ineꞌ.

¹⁶Idoꞌ Zakoboꞌ nene Zoseheꞌ meleho minineꞌ. Idoꞌ Zoseheꞌ nene Izesuꞌ izeleho Maliaꞌ neꞌmi vanaho minineꞌ. Aꞌmine ve Izesuꞌnimuꞌ nene Oꞌmosoꞌmo leliꞌ do luꞌ izelive lo imiselelesa live ve lo laaꞌ noune.

¹⁷Eveneꞌ guliveꞌine neꞌmino gizuneꞌ nene Abalahamuꞌ gulivelotiꞌ vo Davidiꞌ guliveloꞌ ivo nene guliveꞌine fotini (14) neꞌmine gizune. Idoꞌ Davidiꞌ gulivelotiꞌ Babelonia ve nete Zuda ve ngeleꞌmizi Babelonia misubouko vaniꞌ gizunida nene eveneꞌ guliveꞌine gohi fotini (14) neꞌmine nene gizune. Idoꞌ Babelonia misubouko vi mini tineꞌ mili aniꞌ gizunidotiꞌ vo Oꞌmosoꞌmo do luꞌ izelive lo imiselelesa live neꞌmi guliveloꞌ ivo nene guliveꞌine gohi fotini (14) neꞌmine nene gizune.

¹⁸Oꞌmosoꞌmo do luꞌ izelive lo Imiselelesa live Izesuꞌ sotoꞌ ineꞌ monovo nene neꞌmino neive: Izesuꞌ izeleho Maliaꞌ nene Zoseheꞌ izeni elenaho minineꞌza olihe bizi minamasivo Oꞌmosoꞌmi Sikalahuꞌ neꞌmo Maliaꞌ mulunouꞌ lemo mino izipe molo imineꞌ.

¹⁹Neꞌmine ogavo vanaho Zoseheꞌ aza aꞌminemuꞌ ningo gelo ve lisiheꞌ minineꞌ nenako nemuꞌ Maliaꞌni nene eveneꞌ mukilite nigilavo hulo-deloniꞌ nene ovozo helalive lo gelo zegeno haleko hulo-delove lo gilineꞌ.

²⁰Idoꞌ neꞌmino gala geleꞌmo nomonivo Guvelesi veꞌmi angeloꞌ maliꞌmo vamutoꞌ sotoꞌ o emo tiꞌ lo lo-imineꞌ: Zoseheꞌ gaza guvelesi ve Davidiꞌ aꞌvo make, veneka Maliaꞌni nene dalohe hulo-delohe lo gaka gopo nogelaineꞌ nene gelamozo. Izipahala nominineꞌ nene Oꞌmosoꞌmi Sikalahuliꞌmidatiꞌ nenako ne ha dalosane.

²¹Neꞌmine oganivo gipe ma gedeleseive. Neꞌmine ogavo gulive Izesuꞌ ve lo molalosane. Aꞌmine gulive neꞌmi monovo nene do luꞌ izelive ve. Idoꞌ eze evenele zuho neti lihimeꞌine hulo-ngedo do nguꞌ izelineꞌ nenako nemuꞌ guliveꞌve nene Izesuꞌ ve lo molalosane.

²²Initeꞌ mukiꞌ neꞌmino sotoꞌ ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete maliꞌmo Guvelesi veꞌmo lineꞌ gamazi ma lo-ngimineꞌ nene gihile izelive losa sotoꞌ ineꞌ. Idoꞌ aꞌmine Guvelesi veꞌmo lineꞌ gamazi nene neꞌmino neive:

²³Zaha ningamineꞌ alu maliꞌmo izipahala mino gipele gedelineꞌ nene guliveꞌve Emanueliꞌ ve li milalisave. Aꞌmine gulive Emanueliꞌ neꞌmi monovo di velepeꞌ izaniꞌ nene neꞌmino neive: Oꞌmoso lelikisi neive.

²⁴Idoꞌ neꞌmine ogavo Zoseheꞌ aza okisetiꞌ otosa angeloꞌ lidoꞌ nene gele do elenahine Maliaꞌni nene eleꞌmize numuꞌveuꞌ molaniꞌza

²⁵okoꞌnoloꞌ damivo gipele ma gedavo gulive Izesuꞌ ve lo molaniꞌ.